Bimba

"ಬದುಕು" ಎನ್ನುವ ಮೇಷ್ಟ್ರು

2011-07-01T01:23:00.000-07:00

ಕಳೆದ ಆರು ತಿಂಗಳಲ್ಲಿ ಎಷ್ಟೆಲ್ಲಾ ಒತ್ತಡಗಳು, ಏರಿಳಿತಗಳ ನಡುವೆ ಈಗ ಕೊಂಚ ಬಿಡುವಾಗಿದೆ. ಕೆಲಸದ ಗೊಂದಲ, ಹೊಸ ಕೆಲಸ, ಕಂಪನಿ, ಹೊಸ ಜಾಗ, ಜನ! ವರ್ಷಗಳಿಂದ ಹದಗೆಟ್ಟ ಬದುಕು ಈಗ ನಿಧಾನಗತಿಯಲ್ಲಿ ಸ್ಥಿಮಿತಕ್ಕೆ ಬರುತ್ತಿದೆ. ಇಂಥದ್ದೊಂದು ಬದಲಾವಣೆಗೆ ಮನಸ್ಸು ಹಾತೊರೆಯುತ್ತಿತ್ತು. ಗೆದ್ದಲು ಹಿಡಿದಿದ್ದ ಬದುಕು ಹೊಸ ಮಳೆಯನ್ನು ಕಂಡಿದೆ. ಆ ಮಳೆಯಲ್ಲಿ ಅಂಟಿದ್ದ ಗೆದ್ದಲು ನಿಧಾನವಾಗಿ ಕಳಚಿ ಉದುರುತ್ತಿದೆ! ಬೇಡವಾದ ಕೊಳಕು, ಭಾರವಾಗಿ ಹೊರಲಾರದ ಹೊರೆಯಾಗಿದ್ದ, ಹೆಣಗಳಂತೆ ಜೋತು ಬಿದ್ದಿದ್ದ ಕಹಿನೆನಪುಗಳ ಒಣಗಿದ ತರಗೆಲೆಗಳು ಎಲ್ಲಾ ಉದುರಿ; ಹೊಸ ಮುಂಗಾರಿಗೆ ಇದೇ ಹೇಸಿಗೆಯ ತರಗೆಲೆಗಳು, ಗೆದ್ದಲು ಮಣ್ಣು ನನ್ನ ಆಳದ ಬೇರುಗಳಿಗೆ ಗೊಬ್ಬರವಾಗಿದೆ! ನಾನು ಇನ್ನೂ ಸೊಂಪಾಗಿ ಬೆಳೆಯುತ್ತಿದ್ದೇನೆ! ಈ ಮುಂಗಾರಿಗೆ ಹೊಸ ಚಿಗುರೆಲೆಗಳು ಮೂಡುತ್ತಿವೆ.!

ಕಾಲನ ಋತು ಚಕ್ರದ ಯಾವುದೋ ತಿರುವಿನಲ್ಲಿ ನಾನು ಎಲ್ಲೋ ಮರೆತುಹೋಗಿದ್ದ ನನ್ನ ನಗು, ಮುಗ್ದತೆ, ಪ್ರೀತಿ, ಸುಖ ನಿದ್ದೆ ಮತ್ತೆ ಅರಸಿ ಬಂದು ಚಿಟ್ಟೆಗಳಾಗಿ ನನ್ನನ್ನಾವರಿಸುತ್ತಿವೆ! ಕರಾಳ ಬೇಸಿಗೆ ನನ್ನ ಎಲ್ಲಾ ಕೊಳಕನ್ನು ಕಳಚಿ ನಗ್ನವಾಗಿಸಿದೆ. ಈ ಮುಂಗಾರು ನನ್ನ ಬಾಲ್ಯವನ್ನು ಹಿಂದಿರುಗಿಸುತ್ತಿದೆ.

ಬದುಕೇ ಹೀಗೆ ಅಲ್ಲವೇ?

ಮಳೆಗಾಲವು ಪ್ರಕೃತಿ ಮತ್ತು ಜೀವಜಾಳಕ್ಕೆ ಹೊಸ ಚೈತನ್ಯವನ್ನು ತರುತ್ತದೆ. ಚಳಿಗಾಲವೂ ಬದುಕನ್ನು ಸಂಭ್ರಮಿಸುವಂತೆ ಮಾಡುತ್ತದೆ, ತಂಪಿನಲ್ಲೂ ಬದುಕನ್ನು ಬೆಚ್ಚಾಗಿರಿಸುತ್ತದೆ. ಮತ್ತು ಬೇಸಿಗೆಗಾಲವೂ ತನ್ನ ತಾಪಕ್ಕೆ ಎಲ್ಲವನ್ನೂ ಹಿಂಡಿ, ಹಿಂಗಿಸಿ, ಕುಗ್ಗಿಸಿಬಿಡುತ್ತದೆ!!

ಮತ್ತೆ ಮಳೆಗಾಲ, ಚಳಿಗಾಲ ಮತ್ತು ಬೇಸಿಗೆಗಾಲ... ಈ ಕ್ರಿಯೆ ನಿರಂತರ...

ಈಗೆಯೇ ಬದುಕಿನಲ್ಲೂ ಒಂದು ಋತುಚಕ್ರ ತಿರುಗುತ್ತಿರುತ್ತದೆ! ಈ ಎಲ್ಲಾ ಋತುಗಳ ಮಧ್ಯೆಯೇ ಬದುಕು ಸಾಗಬೇಕು ಮತ್ತು ಸಾಗುತ್ತದೆ! ಅದೇ ಬದುಕನ್ನು ಇನ್ನೂ ಸ್ವಾರಸ್ಯ ಭರಿತವಾಗಿ ಇರಿಸಿರುವುದು. ಕಷ್ಟ, ಸುಖ, ದುಖಃ, ವಿರಹ, ಬೇಸರ, ಒತ್ತಡ, ನಗು, ಪ್ರೀತಿ ಈಗೆ ಬದುಕಿನ ಎಲ್ಲಾ ಏರಿಳಿತಗಳನ್ನೂ ಮುಟ್ಟಿಸಿ ಮತ್ತೆ ಒಂದು ಸಮಾನಾಂತರ ಗೆರೆಗೆ ತಂದು ನಿಲ್ಲಿಸಿ ಸಾಕ್ಷಾತ್ಕರಿಸುವ ಬದುಕು, ಮತ್ತೆ ಅದೇ ಸುಳಿಯಲ್ಲಿ ಗಿರಿಗಿಟ್ಲೆಹೊಡೆಸಿ ನಮ್ಮನ್ನು ಪರಿಪೂರ್ಣ ಮಾಡುವ ಅನುಭವಗಳ ಧಾರೆ ಎರೆಯುವುದು ಎಷ್ಟು ವಿಚಿತ್ರ!!

"ಬದುಕು" ಎನ್ನುವ ಮೇಷ್ಟ್ರು ಕಲಿಸುವ ಪಾಠ ದೊಡ್ಡದು! ಸಾಯುವ ಕೊನೆಗಳಿಗೆಯವರೆಗೂ ನಮ್ಮನ್ನು ವಿಧ್ಯಾರ್ಥಿಯನ್ನಾಗಿ ಇರಿಸಿರುತ್ತದೆ!

ಬದುಕಿನ ಬಗ್ಗೆ ಮಾತನಾಡುತ್ತಾ ಕುಳಿತರೆ ಇದು ಬರೀ ಅಚ್ಚರಿಯ, ಪ್ರಶ್ನೆಗಳ ಹಾಗೂ ಕುತೂಹಲದ ರಾಶಿ ರಾಶಿ ಮೂಟೆಗಳು! ಎಂದೂ ಮುಗಿಯದ ಸಾಲುಗಳು!

ಈ ಎಲ್ಲದರ ನಡುವೆ ಬೀಳುತ್ತಾ, ಏಳುತ್ತಾ, ಜೀಕುತ್ತಾ ಇನ್ನಷ್ಟು ಸ್ವಾರಸ್ಯಭರಿತವಾಗಿ ಬದುಕನ್ನು ಕಟ್ಟಿಕೊಳ್ಳುವುದು ನಮ್ಮದೇ ಜವಾಬ್ದಾರಿ!

ಈ ಮಳೆಗಾಲ ನನ್ನ ಬಳಗದವರೆಲ್ಲರಿಗೂ ಹೊಸ ಚೈತನ್ಯ ತರಲೆಂದು ಆಶಿಸುತ್ತೇನೆ.

ಈ ನನ್ನ ಎಲ್ಲಾ ಒತ್ತಡಗಳ ನಡುವೆ ನನ್ನ ಬ್ಲಾಗು ನೆನೆಗುದಿಗೆ ಬಿದ್ದಿರುವುದನ್ನು ನಾನು ಗಮನಿಸಿದೆ! ಇನ್ನುಮುಂದೆ ಖಂಡಿತವಾಗಿಯೂ ತಿಂಗಳಿಗೆ ಕನಿಷ್ಟ ಒಂದು ಬರಹವನ್ನು ತಪ್ಪದೇ ಬರೆಯುತ್ತೇನೆ. ಈ ಬ್ಲಾಗನ್ನು ಕೇವಲ ಛಾಯಾಗ್ರಹಣ, ವನ್ಯಜೀವಿ, ಪಕ್ಷಿ ಕಲರವ ಮತ್ತು ಪರಿಸರಕ್ಕೆ ಸಂಭಂದಿಸಿದ ಬರಹಗಳಿಗೆ ಸಿಮಿತಿಗೊಳಿಸಲು ನಿರ್ಧರಿಸಿದ್ದೇನೆ. ಇತರೆ ಬರಹಗಳಿಗೆ ಶೀಘ್ರವೇ ಇನ್ನೊಂದು ಬ್ಲಾಗು ಪ್ರಾರಂಭಿಸಲು ಚಿಂತಿಸುತ್ತಿದ್ದೇನೆ.

ಗೌರೀಶ ಕಪನಿ

ಧನ್ಯವಾದಗಳು - Thank You!

2011-04-14T11:20:00.000-07:00

ಪ್ರಿಯರೇ,

ಬನದ ಬದುಕು ವನ್ಯಜೀವಿ ಛಾಯಾಚಿತ್ರ ಪ್ರದರ್ಶನ ನಿಮ್ಮೆಲ್ಲರ ಪ್ರೀತಿ, ಹಾರೈಕೆಗಳಿಂದ ಯಶಸ್ವಿಯಾಗಿದೆ. ತಮ್ಮ ದಿನ ನಿತ್ಯದ ರಗಳೆಗಳಲ್ಲಿಯೂ ಬಿಡುವು ಮಾಡಿಕೊಂಡು ಪ್ರದರ್ಶನಕ್ಕೆ ಆಗಮಿಸಿದ ಪ್ರತಿಯೊಬ್ಬರಿಗೂ ನಾವು ಆಭಾರಿಯಾಗಿದ್ದೇವೆ. ನಿಮ್ಮ ಪರಿಸರ ಪ್ರೀತಿಯ ಜೀವಂತಿಕೆ ಸಾಕ್ಷಿ ಈ ಪ್ರದರ್ಶನದ ಯಶಸ್ಸು.

ಸಣ್ಣ ಮಕ್ಕಳು, ಶಾಲಾ ವಿಧ್ಯಾರ್ಥಿಗಳು, ಯುವಕ - ಯುವತಿಯರು, ಮದ್ಯವಯಸ್ಕರು, ಹಿರಿಯರು ಎಲ್ಲರೂ ಪ್ರಕೃತಿಯ ಸೊಬಗ ಮುಂದೆ ಮುಗ್ದ ಮನಸ್ಕರಾಗಿ ಅವರ ಕಣ್ಣಂಚಿನ ಆಶ್ಚರ್ಯ ಮತ್ತು ಆನಂದದ ಬೆಳಕು ನಮಗೆ ಕಂಡಿತು!

ಅಲ್ಲಿಗೆ, ನಮ್ಮ ಶ್ರಮ ಸಾರ್ಥಕ!

ಪರಿಸರ ಪ್ರೇಮಿಗಳಿಗೆ, ಮಾದ್ಯಮ ಮಿತ್ರರಿಗೆ, ನಮ್ಮ ಬಳಗದ ಗೆಳೆಯರಿಗೆ, ನಮ್ಮನ್ನು ಸಹಿಸಿಕೊಂಡು ಪ್ರೋತ್ಸಾಹಿಸಿದ ಕುಟುಂಬದವರಿಗೂ ಹಾಗೂ ಪ್ರದರ್ಶನಕ್ಕೆ ಆಗಮಿಸಿದವರಿಗೂ... ನೇರವಾಗಿ ಹಾಗೂ ಪರೋಕ್ಷವಾಗಿ ನಮ್ಮ ಜೊತೆಗಿದ್ದ ಎಲ್ಲರಿಗೂ ನಮ್ಮ ಕೃತಜ್ಞತೆಗಳು.

ಪ್ರದರ್ಶನದ ವೇಳೆ ಚಿತ್ರಗಳ ಮುಂದೆ ಪ್ರೇಕ್ಷಕರ ಭಾವಾಭಿವ್ಯಕ್ತಿಯ ಕೆಲವು ವೀಡಿಯೊ ತುಣುಕುಗಳನ್ನು ದಾಖಲಿಸಲಾಗಿದೆ. ಅನಿವಾರ್ಯ ಕಾರಣಗಳಿಂದ ಬರಲಾರದ ಪ್ರಿಯರಿಗೆ ಒಂದು ಸಣ್ಣ ವೀಡಿಯೊ ತುಣುಕು.

ಕಾಮೆಂಟ್ ಪುಸ್ತಕದಲ್ಲಿ ಪ್ರೇಕ್ಷಕರು - ಪರಿಸರ ಪ್ರಿಯರು ಬರೆದ ಕೆಲವು ಆಯ್ದ ಸುಂದರ ಕಾಮೆಂಟುಗಳು!

"Conservation and Protection of Wildlife has been hidden in the photography of Lokesh Mosale and Gowreesh Kapani. The exhibition is unique and educative"
- Kumar, ACF

"ಬನವನ್ನೇ ಬೆಂಗಳೂರಿಗೆ ತಂದಂತಿದೆ. ಅತ್ಯುತ್ತಮ ಛಾಯಾಚಿತ್ರಗಳು, ಪಕ್ಷಿಗಳು, ಪ್ರಾಣಿಗಳು, ಪ್ರಕೃತಿಯ ಕಾಡುಗಳನ್ನು ಅದೆಷ್ಟು ಮುಗ್ದವಾಗಿ, ಸಹಜವಾಗಿ ಪ್ರಕಟಪಡಿಸುತ್ತವೆ! ಗೌರೀಶ್ - ಲೋಕೇಶ್ ಅವರ ಈ ಉತ್ಕೃಷ್ಟ ಪ್ರಯತ್ನ ಕಾಂಕ್ರಿಟ್ ಕಾಡಿನಲ್ಲಿರುವವರಿಗೆ ಕಾಡಿನ ಮೋಹ ಬೆಳೆಸಲಿ. ಕಾಡು ರಕ್ಷಣೆಯ ಬದ್ದತೆಯನ್ನು ಮೂಡಿಸಲಿ."

- ಈ. ವೀರೇಶ್

"Where a thousand words are spelt.... in each snap!"

- Prasad. YPS

"ಬನದ ಬದುಕು ಬೆಂಗಳೂರಲ್ಲೂ ಲಭ್ಯ!!"

- ಶರಶ್ಚಂದ್ರ

"Very good work, Very Difficulty to catch those special moments in the wild"

- TNA Perumal

"ಬನದ ಬದುಕು ಸಾರ್ಥಕ!"

- ಸುಗುಣ ಸಾಗ್ಗೆರೆ ರಾಮು

"ಚೆನ್ನಾಗಿದೆ ಅಂತ ಹೇಳ್ತೀನಿ. ಆದರೆ ಈ ಅಕ್ಷರಗಳು ನನ್ನೊಳಗಿನ ಅನಿಸಿಕೇನ ವ್ಯಕ್ತಪಡಿಸಲು ಸೋಲ್ತಿವೆ, ಹಾಗಾಗಿ ಇನ್ನೇನು ಹೇಳ್ಬೇಕು ಗೊತ್ತಿಲ್ಲ!"

- ಪಿ.ವಿ. ನಂಜರಾಜೇಅರಸು

"ವರ್ಣಿಸದಿದ್ದರೆ ನೀನೆ ಎಲ್ಲಾ, ವರ್ಣಿಸಲು ಹೋದರೆ ನಿನ್ನ ಅಂದ ಸೀಮಿತ ಶಬ್ದಗಳಲ್ಲಿ ವರ್ಣಿಸಿದಂತಾಗುತ್ತೆ!"

- ಅದೀಬ್ ಅಕ್ತರ್

"Changed my view of wildlife here, Thanks!"

- Aneesh

"Thought provoking photography"

- Dr. S. Ramesh

"I like this all, because its very nice!"

- Monali

"ಲೋಕೇಶ್, ನಿಮ್ಮ ಜೊತೆ ಕಾಡಿಗೆ ಹೋಗಿ ಬಂದ ಅನುಭವ ಆಗಿದೆ!"

- ಶಿವಸುಬ್ರಮಣ್ಯ

ನಿಮ್ಮ ಪ್ರೀತಿಗೆ ನಾವು ಆಭಾರಿ!

ಗೌರೀಶ್ ಕಪನಿ

ಲೋಕೇಶ್ ಮೊಸಳೆ

ಬನದ ಬದುಕು 2010 - ವನ್ಯಜೀವಿ ಛಾಯಾಚಿತ್ರ ಪ್ರದರ್ಶನ

2010-11-30T03:53:00.000-08:00

ಪ್ರಿಯ ಸ್ನೇಹಿತರೆ, ಓದುಗರೆ.

ಗುರು, ಸಹೋದರ, ಗೆಳೆಯ ಲೋಕೇಶ್ ಮೊಸಳೆಯೊಂದಿಗೆ ನನ್ನ ಎರಡನೇ ವನ್ಯಜೀವಿ ಛಾಯಾಚಿತ್ರ ಪ್ರದರ್ಶನವನ್ನು ಇದೇ ಡಿಸೆಂಬರ್ 9 ರಿಂದ 15 ರವರೆಗೆ ಚಿತ್ರಕಲಾ ಪರಿಷತ್ತಿನಲ್ಲಿ ಆಯೋಜಿಸಲಾಗಿದೆ. ನಮ್ಮ ಪ್ರಕೃತಿ ಮತ್ತು ವನ್ಯಜೀವಿ ಜಗತ್ತಿನ ಹಾದಿಯಲ್ಲಿ ಸೆರೆಹಿಡಿದ ಸಾವಿರಾರು ಚಿತ್ರಗಳಲ್ಲಿ ಕೆಲವನ್ನು ನಿಮ್ಮೊಂದಿಗೆ ಹಂಚಿಕೊಳ್ಳಲು ಬಯಸಿದ್ದೇವೆ.

ನಿಮ್ಮ ಗೆಳೆಯರು, ಕುಟುಂಬದವರೊಂದಿಗೆ ಬಂದು ಪ್ರದರ್ಶನ ವೀಕ್ಷಿಸಿ. ನಿಮ್ಮ ಆಗಮನ, ಸಂತೋಷ, ಒಂದಷ್ಟು ಹರಟೆ ನಮಗೆ ಖುಷಿ ತರುವುದು.

ಆಸಕ್ತ ನಿಮ್ಮ ಸ್ನೇಹಿತರಿಗೂ ತಿಳಿಸಿ, ಕರೆತನ್ನಿ...

ಒಂದು ಚಿತ್ರ, ಒಂದು ಭೇಟಿ, ಒಂದಷ್ಟು ಮಾತು, ಜೊತೆಗೊಂದಷ್ಟು ಪರಿಸರ ಪ್ರೀತಿ; ಸಮಾನ ಅಭಿರುಚಿಯ ಮನಸ್ಸುಗಳು ಬೆರೆಯಲು ಒಂದು ಅವಕಾಶ... ಮತ್ತಿನ್ನೇನು ಬೇಕು?!

ನಿಮಗಾಗಿ ಗ್ರೀಟಿಂಗ್ ಕಾರ್ಡುಗಳು, ಕ್ಯಾಲೆಂಡರುಗಳೂ ಸಹ ಮಾರಾಟಕ್ಕಿರುತ್ತದೆ. ಹೊಸ ವರ್ಷಕ್ಕೆ ಖುಷಿಯ ಜೊತೆಗೆ ಒಂದಷ್ಟು ಪ್ರಕೃತಿ ಪ್ರೀತಿಯೂ ಇರಲಿ.

ನಿಮ್ಮ ನಿರೀಕ್ಷೆಯಲ್ಲಿ...

ಗೌರೀಶ್ ಕಪನಿ
ಲೋಕೇಶ್ ಮೊಸಳೆ

ಹಳದಿ ಕೊರಳಿನ ಪಿಕಳಾರ - Yellow Throated Bulbul

2010-09-07T11:39:00.000-07:00

ಹಳದಿ ಕೊರಳಿನ ಪಿಕಳಾರ (Yellow Throated Bulbul) ಪಿಕಳಾರ ಪ್ರಭೇದಕ್ಕೆ ಸೇರಿದ ಪಕ್ಷಿಗಳಲ್ಲಿ ಒಂದು. ಈ ಹಕ್ಕಿಯು ಹೆಚ್ಚಾಗಿ ಕಲ್ಲು ಬಂಡೆಗಳಿಂದ ಕೂಡಿದ ಬೆಟ್ಟಗಳಲ್ಲಿ ಕಂಡು ಬರುತ್ತದೆ. ತುಂಬಾ ನಾಚಿಕೆ ಸ್ವಭಾವದ ಈ ಹಕ್ಕಿಯನ್ನು ನೋಡಲು ಸ್ವಲ್ಪ ತಾಳ್ಮೆ, ಪ್ರೀತಿ ಮತ್ತು ಸೂಕ್ಷ್ಮ ದೃಷ್ಟಿ ಬೇಕಾಗುತ್ತದೆ. ಮೊದಲೇ ನಾಚಿಕೆಯ ಹಕ್ಕಿಯಾದ ಹಳದಿ ಕೊರಳಿನ ಪಿಕಳಾರ ಗಿಡಗಳ, ಸಣ್ಣ ಮರಗಳ ಸಂದುಗಳಲ್ಲಿ, ಎಲೆ ಕಡ್ಡಿಮರೆಯಲ್ಲಿಯೇ ಬಹುತೇಕ ಸಮಯವನ್ನು ಕಳೆಯುತ್ತದೆ. ಬಲು ಚಟುವಟಿಕೆಯ ಹಕ್ಕಿಯಾದ ಇದು ಕೆಮೆರಾ ಕಣ್ಣಿಗೆ ದಾಖಲೆಯಾಗುವುದು ಕಷ್ಟದ ಕೆಲಸ! ಇಡೀ ದಿನದ ನನ್ನ ಶ್ರಮಕ್ಕೆ, ಸಂಜೆ ಹಿಂತಿರುಗುವ ಹೊತ್ತಿಗೆ ಸಿಕ್ಕಿದ್ದು ಕೇವಲ ೪ ಸಾಧಾರಣ ಚಿತ್ರಗಳು!

ಕೂತಲ್ಲಿ ಕೂರದೇ ಕಡ್ಡಿಯಿಂದ ಕಡ್ಡಿಗೆ ಮರದಿಂದ ಮರಕ್ಕೆ ಹಾರುತ್ತಿರುತ್ತದೆ. ಯಾವುದೋ ಪೊದೆಯ ಸಂದುಗಳಿಂದ ಇದರ ಮಧುರ ಗಾನ ಕೇಳುತ್ತಿರುತ್ತದೆ. ನೀವು ಈ ಪಿಕಳಾರವನ್ನು ಗುರುತಿಸುವ ಹೊತ್ತಿಗೆ, ಇನ್ಯಾವುದೋ ಮರದಲ್ಲಿ ಕೂತಿರುತ್ತದೆ!

ದಕ್ಷಿಣ ಭಾರತದ ಕೆಲವು ಪ್ರದೇಶಗಳಲ್ಲಿ ಈ ಹಕ್ಕಿಯನ್ನು ಕಾಣಬಹುದು. IUCN (International Union for Conservation Nature) ಈ ಹಕ್ಕಿಯನ್ನು ವಿನಾಶದ ಹಾದಿಯಲ್ಲಿರುವ ಹಕ್ಕಿಗಳ ಪಟ್ಟಿಗೆ ಸೇರಿಸಿದೆ. ನಮ್ಮ ಮನೆಯ ಗ್ರಾನೇಟ್, ತಳಪಾಯಕ್ಕೆ ಬಳಸಿರುವ ಕಲ್ಲು, ಜಲ್ಲಿ ಕಲ್ಲು ಈಗೆ ಹಲವು ನಮ್ಮ ಬದುಕಿನ ಐಶಾರಾಮಿ ಅನುಕೂಲಗಳಿಗೆ ಮತ್ತು ನಮ್ಮ ಪ್ರಗತಿಯ ದಾಳಿಗೆ, ನಮ್ಮ ಒಂದಲ್ಲಾ ಒಂದು ನಿತ್ಯ ದಾಹಕ್ಕೆ ಕರಗಿದ ಎಷ್ಟೋ ಕಲ್ಲು ಬಂಡೆ ಗುಡ್ಡಗಳು! ಅದರ ಜೊತೆಗೆ; ಹಳದಿ ಕೊರಳಿನ ಪಿಕಳಾರ ಸೇರಿದಂತೆ ಇನ್ನೂ ಎಷ್ಟೋ ಜೀವರಾಶಿಯ ಬದುಕನ್ನು ಕರಗಿಸಿದೆ.

ಈ ಹಕ್ಕಿಯು ಜೀವಿಸಿವ ತಾಣಗಳ ನಾಶದಿಂದ ಸಂತತಿ ಕ್ಷೀಣಿಸಿದೆ. ಕಲ್ಲು ಗಣಿಗಾರಿಕೆ, ಕಾಡಿನ ಬೆಂಕಿ, ವ್ಯವಸಾಯಕ್ಕೆ ಕಾಡು ಒತ್ತುವರಿ (Granite Quarrying, Forest Fires and Grazing) ಮತ್ತು ಇತರೆ ಕಾರಣಗಳು ಪ್ರಮುಖ ಪಾತ್ರ ವಹಿಸಿವೆ.

ಇದರ ವಾಸ ಯೋಗ್ಯ ತಾಣಗಳ ರಕ್ಶಣೆ, ಮರು ನಿರ್ಮಾಣದಿಂದ ಇದರ ಸಂತತಿ ಹೆಚ್ಚಿಸುವ ಸಾದ್ಯತೆ ಇದೆ.

ಹಳದಿ ಕೊರಳಿನ ಪಿಕಳಾರದ ಜೀವನ ಪದ್ದತಿ:

ತಲೆ, ಕೊರಳು ಮತ್ತು ಕುಂಡೆ ಹಳದಿ ಬಣ್ಣದಿಂದ ಕೂಡಿದ್ದು, ಕೊರಳು ಹೆಚ್ಚಿನ ಹಳದಿ ಹೊಂದಿರುತ್ತದೆ. ಉಳಿದ ಮೈ ಬಣ್ಣ ಬೂದು ಬಣ್ಣದ್ದಾಗಿರುತ್ತದೆ. ಸಣ್ಣ ಹುಳುಗಳು, ಕೀಟಗಳು ಹಾಗು ಕಾಡಿನಲ್ಲಿ ಬೆಳೆವ ಹಲವು ಬಗೆಯ ಗಿಡ, ಮರಗಳ ಹಣ್ಣುಗಳು, ಕಾಯಿಗಳು ಇದರ ಆಹಾರ.

ಜೂನ್ ನಿಂದ ಆಗಸ್ಟ್ ತಿಂಗಳಲ್ಲಿ ಎರಡು ಮೊಟ್ಟೆಯನ್ನಿಟ್ಟು ೨೦ ದಿನಗಳ ಕಾಲ ಕಾವು ಕೊಟ್ಟು, ೧೩ ದಿನಗಳ ನಂತರ ಮೊಟ್ಟೆಯೊಡೆದು ಮರಿಗಳಾಗುತ್ತವೆ. ಸಣ್ಣ ಮರಗಳ ರೆಂಬೆಗಳಲ್ಲಿ ಇವು ಸಾಮಾನ್ಯವಾಗಿ ಗೂಡು ಮಾಡುತ್ತದೆ.

ಮಾಹಿತಿ: ವಿಕಿಪೀಡಿಯಾ

- ಗೌರೀಶ ಕಪನಿ

ಪ್ರೀತಿಯೇ ಆ ದ್ಯಾವ್ರು ತಂದ ಆಸ್ತಿ ನಮ್ಮ ಬಾಳಿಗೆ…

2010-06-21T19:21:00.001-07:00

ತಾಯ್ತನಕ್ಕೆ ಯಾವುದೇ ಭಾಷೆ, ಪ್ರದೇಶ, ಸಂಸ್ಕ್ರುತಿ, ಪರಿಸರ, ಜಾತಿ ಇಲ್ಲಾ. ಒಟ್ಟು ಜೀವ ಜಗತ್ತಿಗೆ ಮೀರಿದ ಒಂದು ಅಪರಿಮಿತ ಅನುಭವ. ತಾಯ್ತನ, ಹೆಣ್ಣು ಜೀವ ಸಂಕುಲಕ್ಕೆ ಪ್ರಕೃತಿಯ ವರದಾನ. ತಾಯ್ತನದ ಭಾಷೆ ಜಗತ್ತಿನ ಎಲ್ಲಾ ಗೆರೆಗಳನ್ನು ಮೀರಿ ಏಕತಾನವಾಗುತ್ತದೆ.

ಜಗತ್ತಿನ ಎಲ್ಲಾ ಜೀವಸಂಕುಲದ ತಾಯಂದಿರಿಗೆ ನನ್ನ ನಮನ.

ನನ್ನ ಪಯಣದಲ್ಲಿ ನಾನು ಎದುರಾದ ತಂದೆ ತಾಯಿಯ ಕಂದನೆಡೆಗಿನ ಪ್ರೀತಿ ಇಲ್ಲಿದೆ. ತನ್ನ ಮಗುವಿಗೆ ಹಾಲುಣಿಸುತ್ತಾ ದ್ಯಾನಸ್ತಸ್ಥಿತಿಯಲ್ಲಿ ಕುಳಿತ ತಾಯನ್ನು ಕಂಡೆ. ಮಗು ಹಾಲು ಹೀರುತ್ತಾ ಹಾಗೇ ನಿದ್ದೆಗೆ ಜಾರುತ್ತಿದೆ. ತಾಯಿ ತನ್ನ ಕಂದನ ತಲೆಯನ್ನು ಹಾಗೇ ಮೆಲ್ಲಗೆ ಹಿಡಿದಿದ್ದಾಳೆ. ಮಗು ಸಂಪೂರ್ಣ ನಿದ್ದೆಗೆ ಜಾರಿ ಮೊಲೆ ತೊಟ್ಟನ್ನು ಬಿಟ್ಟ ತಕ್ಷಣ ತಾಯಿಯ ಕೈಯಲ್ಲಿ ಮಗುವಿನ ತಲೆ! ಮಗುವಿಗೆ ಪೆಟ್ಟಾಗದಂತೆ ರಕ್ಷಣೆ ನೀಡಿದ ತಾಯಿ ಅದೇ ಸ್ಥಿತಿಯಲ್ಲಿ ನಿದ್ದೆಗೆ ಜಾರಿತು. ತನ್ನ ಅರೆ ನಿದ್ರಾವಸ್ಥೆಯಲ್ಲಿಯೂ ಮಗುವಿನೆಡೆಗಿನ ತನ್ನ ಕಾಳಜಿ ಕಳೆದುಕೊಳ್ಳದ ತಾಯಿಗೆ ನನ್ನ ನಮನ. ನಿಜಕ್ಕೂ ತಾಯಂದಿರು ಪೂಜ್ಯರಾಗುವುದು ಇಲ್ಲಿಯೇ.

ಮೊಲೆ ತೊಟ್ಟು ಹೀರುತ್ತಿದ್ದ ಎಳೆ ಕಂದಮ್ಮ ತನ್ನ ನಾಲಗೆಯನ್ನು ಹೊರಗೇ ಬಿಟ್ಟು ನಿದ್ರೆ ಮಾಡುತಿತ್ತು. ನಾನು ಫೊಟೋ ಕ್ಲಿಕ್ಕಿಸುತ್ತಿದ್ದದ್ದನ್ನು ಗಮನಿಸಿದ ತಂದೆ ಅಲ್ಲಿಗೆ ಬಂದು ತನ್ನ ಸಂಸಾರ ಸೇರಿದನು. ನನ್ನನ್ನ ತುಂಬಾ ಹೊತ್ತು ಗಮನಿಸಿದಾತ ನಂತರ ತನ್ನ ಮಗುವಿನ ನಾಲಗೆಯನ್ನು ತನ್ನ ಕೈ ಬೆರಳಿಂದ ಒಳಗೆ ತುರುಕುವ ಪ್ರಯತ್ನ ಮಾಡಿದ. ಅಷ್ಟರಲ್ಲಿ ಎಚ್ಚರಾದ ಮಗು ತನ್ನ ತಾಯಿಯನ್ನು ತಬ್ಬಿ ಹಿಡಿಯಿತು. ಮಗುವಿನ ಜೊತೆಗೆ ಎಚ್ಚರಾದ ತಾಯಿಯು ಮಗುವನ್ನು ತಬ್ಬಿದಳು. ನಂತರ ತನ್ನ ಪತಿರಾಯ ತನ್ನಾಕೆಯನ್ನು ತಬ್ಬಿ ಮಗುವನ್ನು ತಮ್ಮಿಬ್ಬರ ಮದ್ಯೆ ಬೆಚ್ಚಗಿನ ಶಾಖನೀಡುತ್ತಾ ಮಲಗಿಸಿಕೊಂಡು ನಾವಿಬ್ಬರೂ ಈ ಜಗತ್ತಿನ ಅದ್ವಿತೀಯ ಜೋಡಿಗಳು ಎಂದು ಸಾರುತ್ತಿದ್ದಂತಿತ್ತು. ಈ ಕುಟುಂಬ ನಿಜಕ್ಕೂ ಹೊಟ್ಟೆಕಿಚ್ಚು ತರಿಸುವಂತಿತ್ತು.

"ಪ್ರೀತಿಯೇ ಆ ದ್ಯಾವ್ರುತಂದ ಆಸ್ತಿ ನಮ್ಮ ಪಾಲಿಗೆ…" ಎಂದು ತಂಗಾಳಿ ಹಿಮ್ಮೇಳದಲ್ಲಿ ಹಾಡಿದಂದಂತಿತ್ತು.

ತನ್ನ ಒಡಲಲ್ಲಿ ಒಂಭತ್ತು ತಿಂಗಳು ಹೊತ್ತು, ಹೆತ್ತು ತನ್ನ ಕಂದಮ್ಮನಿಗೆ ಹಾಲುಣಿಸದೇ ಬಾಟ್ಲಿ ಹಾಲು ನೀಡುವ ಆಧುನಿಕ ತಾಯಂದಿರಿಗೆ ಇದು ಪಾಠವಾಗಲಿ. ಜನನಕ್ಕೆ ಕಾರಣಾಗುವುದಷ್ಟೇ ನನ್ನ ಕರ್ತವ್ಯ ಮುಂದಿನದ್ದೆಲ್ಲಾ ನನಗೇಕೆ ಅವಳಿದ್ದಾಳಲ್ಲಾ ಎಂದು ಅಸಡ್ಡೆ ತೋರುವ ಆಧುನಿಕ ತಂದೆಯರಿಗೆ ಈ ಕುಟುಂಬ ಸ್ಪೂರ್ತಿಯಾಗಲಿ.

ಪ್ರಕೃತಿಯಿಂದ ಕಲಿಯುವುದು ಸಾಕಷ್ಟಿದೆ!

ಗೌರೀಶ ಕಪನಿ

ಚಿಟವಕ್ಕಿಯ ಶಾಪ ಮತ್ತು ನನ್ನ ಪರದಾಟ

2009-07-08T12:08:00.000-07:00

ಎಂದಿನಂತೆ ಭಾನುವಾರ ನನ್ನ ಕೆಮೆರಾಹೆಗಲಿಗೇರಿಸಿಕೊಂಡು ಕೆರೆಯ ಅಂಚಲ್ಲಿ ಅಲೆಯುತ್ತಿದ್ದೆ. ಯಾಕೋ ಅಂದು ಛಾಯಾಚಿತ್ರದಲ್ಲಿ ಆಸಕ್ತಿಯೇ ಇರಲಿಲ್ಲ, ಅದಕ್ಕೆ ಪೂರಕವಾಗಿ ಅಂದು ಯಾರೂ ನನ್ನ ಕೆಮೆರಾಗೆ ಅತಿಥಿಯೂ ಆಗಲಿಲ್ಲ. ಅದೇ ಬೇಸರದಲ್ಲಿ ಕೆರೆಯ ಮತ್ತೊಂದು ಅಂಚಿನಲ್ಲಿ ಸುಮ್ಮನೆ ತಂಪಾದ ಗಾಳಿಯನ್ನು ಆನಂದಿಸುತ್ತಾ ನೆಡೆಯುತ್ತಿದ್ದೆ. ಯಾರೋ ಆಚೆ ದಡದಲ್ಲಿ ಕುಂಡೆಅಲುಗಾಡಿಸುತ್ತ ಕಳ್ಳ ಹೆಜ್ಜೆ ಇಡುತ್ತಿದ್ದವರ ಕಂಡೆ! ಕುತೂಹಲಗೊಂಡು ಗಮನಿಸುತ್ತಾ ನಿಂತೆ... ಅವರ ಗುರುತು ಸಿಗಲಿಲ್ಲ. ಸೈನಿಕರು ಯುದ್ದಭೂಮಿಯಲ್ಲಿ ಮಲಗಿ ತೆವಳುವಂತೆ ಹತ್ತಿರ ಹೋದೆ. ಈ ಅನಾಮಿಕನ ಪರಿಚಯ ನನಗೆಇರಲಿಲ್ಲ.

"Pratincole" ಮೊದಲ ನೋಟದಲ್ಲೆ ಮನಸೆಳೆವ ಸೌಂದರ್ಯ, ಕಣ್ಣಿಗೆ ಬಿಳಿ ಕಾಡಿಗೆ, ಕೊಕ್ಕಿನಲ್ಲೊಂದಿಷ್ಟು lips stick. ಅತಿ ಬಿಳಿಯೂ ಅಲ್ಲದ, ಕಪ್ಪು, ಕಂದೂ ಅಲ್ಲದ ಕಾದು ಕಾದು ರಂಗಾದ ಕೆನೆಯಂತಿರುವ ಮೈಕಾಂತಿ.

ಒಂದು ತಿಂಗಳ ಬಳಿಕವೂ ಈ ಹಕ್ಕಿಯ ವ್ಯಾಮೋಹ ಹೋಗಲಿಲ್ಲ. ಮತ್ತೆ ಅದೇ ಜಾಗಕ್ಕೆ ಹುಡುಕುತ್ತಾ ಹೊರಟೆ. ಅದೇ ಎರಡು ದಿನಗಳ ಹಿಂದೆ ಬರ್ಜರಿಮಳೆಯಾಗಿ ಕೆರೆಯ ಮಣ್ಣೆಲ್ಲಾ ಕೆಸರಾಗಿ ಜಾರುತಿತ್ತು. ನನ್ನ Gypsyಯ ಮೇಲಿನ ಅತಿಯಾದ ಭರವಸೆಯೊಂದಿಗೆ ಕೆರೆಯ ಅಂಚಿನಲ್ಲಿ, ನೀರಿನಲ್ಲಿ, ಕೆಸರಿನಲ್ಲಿ ಓಡಿಸುತ್ತಾ ಹಳ್ಳಕ್ಕಿಳಿಸಿ ಹೇಗೋ ಮುಂದೆ ಬಂದೆ; ಖುಷಿಪಟ್ಟೆ. Gypsyಯಿಂದಾಗಿ off road driving ಹುಚ್ಚು ಹೆಚ್ಚಾಗಿದೆ!

ಕಳೆದೆ ಬಾರಿ ಭೇಟಿಯಾಗಿದ್ದ ಜಾಗದಲ್ಲಿ ಹುಡುಕತೊಡಗಿದೆ, ಎಲ್ಲೂ ಕಾಣಲಿಲ್ಲ. ಬೇಸರದಲ್ಲೇಸುಮ್ಮನಾಗಿ ಕೆರೆ ನೋಡುತ್ತಾ ನಿಂತೆ. ಜೊತೆಗಿದ್ದ ಗೆಳೆಯನಿಗೆ ಅಲ್ಲೇ ಓಡಾಡುತ್ತಿದ್ದ ಕೊಕ್ಕರೆ ಖುಷಿಕೊಡುತ್ತಿತ್ತು, ಅವನನ್ನು ಅಲ್ಲೇ ಬಿಟ್ಟು ನಾನು ಮುಂದೆ ಸಾಗಿದೆ.

ಹತ್ತಿರತ್ತಿರ ಮಣ್ಣಿನ ಬಣ್ಣಕ್ಕೆ ಸನಿಹದಲ್ಲೆ ಇರುವ ಈ Pratincole ಹತ್ತಿರದಲ್ಲೆ ಇದ್ದರೂ ಗಮನಿಸದೇ ನನ್ನ Gypsyಯನ್ನು ನಿಲ್ಲಿಸಿದ್ದೆ. ಇಲ್ಲೇ ಪಕ್ಕದಲ್ಲಿಏನೋ ಸದ್ದು ಕೇಳಿಸಿ ನೋಡಿದರೆ, ಕುಂಡೆ ಕುಲುಕಿ ಕಿ..ರ್..ರ್... ಕಿ..ರ್..ರ್... ಎನ್ನುತ್ತಿದೆ. ಕಂಡ ಸಂತೋಷಕ್ಕೆ ಗಾಡಿಯನ್ನು ಬಂದ್ ಮಾಡಿ ನೋಡುತ್ತಾ ಕುಳಿತೆ. ಸ್ವಲ್ಪ ಸಮಯದ ನಂತರ ಗಮನಿಸಿದರೆ ಅಲ್ಲಿ ದೊಡ್ಡ ದಂಡೇ ಇದೆ!! ಅವುಗಳ ಕಾಲನಿಯಲ್ಲಿ ನನ್ನ ಕಂಡು ಕೊಂಚ ಗೊಂದಲಗೊಂಡು ಎಲ್ಲವೂ ನನ್ನೇ ನೋಡಿ ನಿಂತು; ಯಾರಿವನು dream boy ಎಂದು ಚರ್ಚೆ ಪ್ರಾರಂಭಿಸಿದಂತೆ ಅನ್ನಿಸಿತು!

ಆ ಗುಂಪಿನಲ್ಲಿ ಒಂದು ಹಕ್ಕಿಯಂತು ನನ್ನ ಇರುವಿಕೆಗೆ ತೀವ್ರ ಅಸಮಧಾನಗೊಂಡು ಧುರುಗುಟ್ಟುತಿತ್ತು. ಸಹಜವಾಗಿಯೇ ನನ್ನ ಗಮನ ಅದರೆಡೆಗೆ ಹೋಯಿತು. ನಾನು ಕೂಡ ಏನಿವಾಗ ಎನ್ನುವರೆಸೆಯಲ್ಲಿ ನೋಡಿದೆ. ಸ್ವಲ್ಪ ಸಮಯದಲ್ಲೇ ಅದರ ರೆಕ್ಕೆಯೊಳಗಿಂದ ಎರಡು ಪುಟ್ಟ ಜೀವಗಳು ಹೊರ ಇಣುಕಿದವು!! ಈಗ ನನಗೆ ಇದರ ಅಸಮಧಾನದ ಕಾರಣ ತಿಳಿಯಿತು. ನಾಲ್ಕೈದು ಸಣ್ಣಕಲ್ಲುಗಳ ಗುಡ್ಡೆ ಸಂದು ತನ್ನ ಮರಿಗಳನ್ನು ಅಡಗಿಸಿಟ್ಟುಕೊಂಡಿದೆ! ನನ್ನ ಕೆಮೆರಾ ಸದ್ದುಮಾಡಲು ಶುರುಮಾಡಿತ್ತು. ಗಾಡಿಯೊಳಗೆ ಕುಳಿತು ಕ್ಲಿಕ್ಕಿಸಿದ angel ನನಗೆ ಸಮಾಧಾನ ಕೊಡಲಿಲ್ಲ. ಕೆಳಗಿಳಿದರೆ ಈ ಮಹಾತಾಯಿಗೆ ಇನ್ನೂ ಹೆಚ್ಚು ಕೋಪವೇರಿ, ಆ ಕೋಪಕ್ಕೆ ನಾನು ಗುರಿಯಾಗುವ ಸ್ಥಿತಿ. ಈ ಉಬಯ ಸಂಕಟದಲ್ಲೇ Gypsyಯಿಂದ ಕೆಳಗಿಳಿದೆ. ನನಗೆ ಹಿಡಿ ಶಾಪವಾಕುತ್ತಾ, ಬೈದಾಡುತ್ತಾ ಗಿರಿಕಿ ಹೊಡೆಯಲು ಶುರು ಮಾಡಿದಳು!

Pratincole ನಾನು ಎಂದಿನಂತೆ ಜಿಪ್ಸಿ ಸಂದಿಯಲ್ಲಿ ಮಲಗಿಕೊಂಡು ಮರಿಗಳ ಚಿತ್ರ ಕ್ಲಿಕ್ಕಿಸಿದೆ. ಈಕೆಯ ಚೀರಾಟ ಗಮನಿಸಿದ ಆಕೆಯ ಪ್ರಿಯಕರನೂ ಬಂದು ನನ್ನ ಸುತ್ತ ಗಿರಕಿ ಹೊಡೆಯಲು ಪ್ರಾರಂಭಿಸಿದ. ಸ್ವಲ್ಪ ಸಮಯ ನಾನು ಹಾಗೆಯೇ ಸ್ತಬ್ದನಾದೆ. ಆಕೆ ಮರಿಗಳ ಹತ್ತಿರ ಕೆಳಗಿಳಿದು ಮರಿಗಳ ಸೇರಿಕೊಂಡಳು. ಆಕೆಯ ಪ್ರಿಯಕರ ಗಿರಕಿಮುಂದುವರಿಸಿದ. ನಾನು ನಿಧಾನಗತಿಯಲ್ಲಿ ಇನ್ನೂ ಸನಿಹವಾಗುವ ಪ್ರಯತ್ನ ನಡೆಸಿದೆ. ಆಕೆಗೆ ಎಲ್ಲಿಲ್ಲದಸಿಟ್ಟು ಬಂದು ಸ್ವಲ್ಪ ದೂರ ಸರಿದಳು, ಈಗ ಏನು ಮಾಡಬಹುದು ಎಂದು ಕಾದು ಕುಳಿತೆ. ಮರಿಗಳು ಯಾವುದೇ ಚಲನೆಯಿಲ್ಲದೆ ಸ್ತಬ್ದವಾಗಿದ್ದವು. ಕಲ್ಲುಗಳ ಜೊತೆ ಅವುಗಳನ್ನುಗುರುತಿಸುವುದೂ ಕಷ್ಟವಾಗಿತ್ತು. ಮರಿಗಳಿಂದ ಸರಿಯಾಗಿ ಎರಡು ಮಾನವನ ಹೆಜ್ಜೆಗಳ ಅಂತರದಲ್ಲಿ ಒಂದು ರೀತಿಯ ಗುಟುರುದನಿಯಲ್ಲಿ ಕೂಗಿದಳು, ಇಲ್ಲಿವರೆಗೂ ಸ್ತಬ್ದವಾಗಿದ್ದ ಮರಿಗಳು ಚಂಗನೆ ಎದ್ದು ತನ್ನ ತಾಯಿಯೆಡೆಗೆ ನಡೆಯಲು ಶುರುಮಾಡಿದವು. ನಡೆಯಲೂ ಆಗದ ಪುಟ್ಟ ಜೀವಗಳು ಹೇಗೋ ಬಿದ್ದು, ಎದ್ದು ತೆವಳಿ ತಾಯಿಯ ರೆಕ್ಕೆಯೊಳಗೆ ಸೇರಿಕೊಂಡವು. ನನ್ನ ಮೇಲೆ ಗಂಡುಹಕ್ಕಿಯ ಹಾರಾಟ, ಚೀರಾಟ ಮುಂದುವರೆದಿತ್ತು. ಸ್ವಲ್ಪ ಚಲನೆಯನ್ನು ನೀಡಿದರೂ ವಿರೋಧ ವ್ಯಕ್ತಪಡಿಸುತ್ತಾ ಆಕ್ರಮಣಕಾರಿಯಾಗಿ ನನ್ನತ್ತ ನುಗ್ಗಿ ಹಿಮ್ಮೆಟ್ಟಿಸುವ ಪ್ರಯತ್ನ ಆತ ಮಾಡುತ್ತಿದ್ದ.

ನಾನು ಮತ್ತೆ ಚಲನೆ ನೀಡದೆ ಮಲಗಿಗಮನಿಸುತ್ತಿದ್ದೆ. ತಾಯಿ ಹಕ್ಕಿಯು ಮತ್ತೆ ಎರಡುಹೆಜ್ಜೆಯಷ್ಟು ದೂರಹೋಗಿ ಅದೇ ಗುಟುರುದನಿಯಲ್ಲಿ ಮರಿಗಳನ್ನು ಕರೆದು ಅಲ್ಲಿಗೆ ತನ್ನಮರಿಗಳನ್ನು ಕರೆಸಿಕೊಂಡಿತು. ಅದರ ಗೂಡಿಂದ ಸುಮಾರು ಆರು ಮಾನವ ಹೆಜ್ಜೆಯಷ್ಟು ಸುರಕ್ಷಿತ ಅಂತರ ಕಾಪಾಡಿಕೊಂಡು ತನ್ನ ರೆಕ್ಕೆಯೊಳಗೆ ತನ್ನಮರಿಗಳನ್ನು ಅವಿತುಕೊಂಡು ಕುಳಿತುಕೊಂಡಿತು.

ಇನ್ನೂ ಹೆಚ್ಚಿಗೆ ತೊಂದರೆಕೊಡಲು ಬಯಸದೇ ಸುಮ್ಮನೆ ಗಮನಿಸುತ್ತಾ ಕುಳಿತೆ. ಅಷ್ಟರೊಳಗೆ ನನ್ನ ಸ್ನೇಹಿತನ ಆಗಮನವಾಯಿತು. ಅವನಲ್ಲಿ ಸಣ್ಣ ವಿಡಿಯೋ ಕೆಮೆರಾ ಇತ್ತು ಅದರ ಸಹಾಯದಿಂದ ನನ್ನ ಮೊದಲನೇ ವಿಡಿಯೋ ಚಿತ್ರೀಕರಣ ಮಾಡಿದೆ. ಮರಿಗಳ ರಕ್ಷಣೆ, ಮರಿಗಳ ತಾಯಿ ಬಳಿಹೋಗುವ ಪರಿ... ವ್ವಾ.. ಪ್ರಕೃತಿ ಮಾತೆಗೆ ಶರುಣು. ವಿಡಿಯೋ ನೋಡಿ.

ನಂತರ ಇಲ್ಲಿಂದ ಹೊರಟು ವಾಪಸ್ಸಾಗುವ ಮನಸ್ಸು ಮಾಡಿ ಹೊರಟೆವು. ಕೆರೆಯ ಅಂಚಿನಲ್ಲಿ ಒಂದು ಹಳ್ಳಕ್ಕೆ ನಮ್ಮ Gypsyಯನ್ನು ಇಳಿಸಿ ಅದು ಅಲ್ಲೇ ಕೆಸರಿನಲ್ಲಿ ಸಿಕ್ಕಿಹಾಕಿಕೊಂಡಿತು. ಮುಂದೆ ಹೋಗಲಾಗದೇ, ಹಿಂದೆಯೂ ಬರಲಾರದೇ ನನ್ನ ಕೈಲಾಗುವುದಿಲ್ಲವೆಂದು ಅಲ್ಲೇ ನಿಂತು ಬಿಟ್ಟಿತು. ಆಗ ಪಕ್ಕದ ಹಳ್ಳಿಗೆ ಸುಮಾರು ಒಂದೂವರೆ ಕಿ.ಮೀ ನೆಡೆದು ಹೋಗಿ ಅಲ್ಲಿ ಒಬ್ಬ ಮಹಾತ್ಮರ ಸಹಾಯ ಪಡೆದು Tractorರನ್ನು ಕರೆಸಿ Gypsyಯನ್ನು ಆಚೆ ಎಳೆಸಿ ಹೇಗೋ ಬೇರೆ ರಸ್ತೆಯಲ್ಲಿ ಹೊರಬಂದೆವು! ಇಷ್ಟಾಗುವಷ್ಟರಲ್ಲಿ ಗುಡ್ಡದ ತುದಿಯಿಂದ ಸೂರ್ಯ ನೆತ್ತಿಯ ಮೇಲೆ ಬಂದಿದ್ದ!

ನಂತರ ಇದು ಆ ಮಹಾತಾಯಿಯು ನೀಡಿದ ಶಾಪದ ಫಲವೆಂದು ಯೋಚಿಸುತ್ತಾ ಸಮಾಧಾನಪಟ್ಟುಕೊಂಡೆವು...!

ಈಗ ಆ ಮರಿಗಳು ದೊಡ್ಡದಾಗಿವೆ... ಹಾರುವುದ ಕಲಿತಿವೆ.

ನಮ್ಮ ಅಗ್ನಿಯವರು ಈ Pratincoleಗೆ "ಕವಲುಬಾಲದ ಚಿಟವ" ಎಂದು ಕನ್ನಡದಲ್ಲಿ ಕರೆದಿದ್ದಾರೆ. ನಾನೂ ಅದೇ ಹೆಸರನ್ನು ಮುಂದುವರಿಸುತ್ತೇನೆ. ಈ ಚಿಟವದ ಬಗ್ಗೆ ಕೆಲವು ಮಾಹಿತಿ. ಈ ಹಕ್ಕಿಗೆ ನಾಚಿಕೆ ಜಾಸ್ತಿ. ನಿಮ್ಮನ್ನು ಕಂಡ ಕೂಡಲೇ ನಾಚಿ ದೂರಾಗುತ್ತವೆ! ಇವು ಹೆಚ್ಚಾಗಿ ಸಮುದ್ರದ ಅಂಚಲ್ಲಿ ಅಥವಾ ನಿಮ್ಮೂರಿನ ಕೆರೆಯ ಅಂಚಲ್ಲಿ ಕಂಡುಬರುತ್ತವೆ. ಸ್ವಲ್ಪ ಮರುಳು, ಸಣ್ಣ ಕಲ್ಲುಗಳು ಮಿಶ್ರಿತ ಕೊಂಚ ಕೆಸರು ಪ್ರದೇಶ್ ಇಷ್ಟ. ನೀರಿನಲ್ಲಿರುವ ಸಣ್ಣ ಹುಳುಗಳು ಇವಕ್ಕೆ ಆಹಾರ. ಸಣ್ಣ ಹಣ್ಣು ಕಾಯಿಗಳೂ ಪ್ರಿಯ. ಕಣ್ಣಿಗೆ ಬಿಳಿ ಕಾಡಿಗೆ, ಕೊಕ್ಕಿನಲ್ಲೊಂದಿಷ್ಟು ಕೆಂಪು ಬಣ್ಣ ಕಪ್ಪು ಗೆರೆಯ ಬಾಲ ಮತ್ತು ಬೂದುಮಿಶ್ರಿತ ಕಪ್ಪು ಬಣ್ಣದ ಕೊಕ್ಕು ಮತ್ತು ಕಾಲು ಇದರ ಗುಣ ಲಕ್ಷಣಗಳು.

ಸಂತಾನಭಿವೃದ್ದಿ ಸಾಮಾನ್ಯವಾಗಿ ದಿಸೆಂಬರ್ ನಿಂದ ಮೇ ತಿಂಗಳಾವಧಿಯಲ್ಲಿ ಎರಡರಿಂದ ನಾಲ್ಕು ಮೊಟ್ಟೆಗಳನ್ನಿಟ್ಟು ಮರಿ ಮಾಡುತ್ತದೆ. ಸಾಮಾನ್ಯವಾಗಿ ನೀರಿನಂಚಿನಲ್ಲಿರುವ ಸಣ್ಣಕಲ್ಲುಗಳ ಗುಡ್ಡೆ ಸಂದುಗಳಲ್ಲಿ ಕಲ್ಲಿನಂತೆಯೇಕಾಣುವ ಮೊಟ್ಟೆಗಳನ್ನಿಟ್ಟು ಮರಿ ಮಾಡುತ್ತವೆ.

ಈ ಚಿಟವಕ್ಕಿ ದಕ್ಷಿಣ ಭಾರತದಲ್ಲಿ, ಉತ್ತರಕರ್ನಾಟಕ, ಕೇರಳಾ ಮತ್ತು ಕಣ್ಣೂರು ಪ್ರದೇಶಗಳಲ್ಲಿ ಜಾಸ್ತಿಯಾಗಿ ನೋಡಲುಸಿಗಬಹುದು.

ಕಪಟ ಮೊಸಳೆಯು, ಅದರ ಮೋಸದ ಬುದ್ದಿಯು - ನೀತಿ ಕಥೆ

2009-03-09T10:48:00.000-07:00

ಏನಿದು ಪರಿಸರ - ಪ್ರಾಣಿ ಪ್ರೇಮಿಯ ಬ್ಲಾಗ್ ನಲ್ಲಿ ನೀತಿಕಥೆ ಎಂದು ವಿಚಿತ್ರವೆಸಿಸುತ್ತಿದೆಯಾ?!

ನಮ್ಮ ಬಾಲ್ಯದಲ್ಲಿ ಇಂಥ ಎಷ್ಟೋಂದು ನೀತಿ ಕಥೆಗಳು ನಮಗೆ ಕೇಳಲು, ಓದಲು ಲಭ್ಯವಿತ್ತು. ಇಂಥ ಕಥೆಗಳಿಂದ ಒಂದಷ್ಟು ನೀತಿಗಳು ಕನಿಷ್ಟ ಪ್ರಭಾವ ನಮ್ಮ ಮೇಲೆ ಇಂದು ಬೀರಿದೆ ಎಂದು ಭಾವಿಸುತ್ತೇನೆ. (ಕನಿಷ್ಟ, ಕೆಲವರಲ್ಲಾದರೂ...!) ಜೊತೆಗೆ ಕಥೆ ಹೇಳಿದ ಅಜ್ಜ, ಅಜ್ಜಿ, ಅಮ್ಮ, ಅಪ್ಪ, ಮೇಷ್ಟ್ರು ಅಥವಾ ಇನ್ಯರೋ ನಮ್ಮ ಪಾಲಿಗೆ ಬೇರೆಯದೇ ರೀತಿಯಲ್ಲಿ ಬಿಂಬಿತವಾಗಿದ್ದಾರೆ ಹಾಗೇ ಕಥೆಗಳ ನೆಪದಲ್ಲಿ ಇವರುಗಳು ಎಲ್ಲೆಲ್ಲೋ ನೆನಪಾಗುತ್ತಾರೆ. ಈ ನೀತಿಕಥೆಗಳ ಲಾಭ ಇಲ್ಲಿಗೇ ನಿಲ್ಲುವುದಿಲ್ಲ. ಈ ಕಥೆಗಳಲ್ಲಿ ಕಾಡು, ಗಿಡ, ಮರ, ಹೂವುಗಳು, ಚಿಟ್ಟೆಗಳು, ಪ್ರಾಣಿಗಳು ಮತ್ತು ಪಕ್ಷಿಗಳೂ ಬಂದು ತಮ್ಮ ಪಾತ್ರ ನಿರ್ವಹಿಸುತ್ತವೆ. ಇದರಿಂದಾಗಿ ನಮಗೆ ಇಂದಿಗೂ ನಮ್ಮ ಬಾಲ್ಯ ನೆನೆದರೆ ಕಣ್ಣಲ್ಲಿ ಒಂದು ಮಿಂಚು ಮೂಡುತ್ತದೆ, ನೆನಪಿನ ಬುತ್ತಿ ಬೆಳದಿಂಗಳಾಗುತ್ತದೆ. ಇದರೊಂದಿಗೆ ನಮಗೆ ಒಂದಷ್ಟು ಗಿಡಗಳ, ಮರಗಳ, ಹಣ್ಣಿನ, ಪ್ರಾಣಿಗಳ ಮತ್ತು ಪಕ್ಷಿಗಳ ಹೆಸರು ಗೊತ್ತು. ಅವುಗಳೊಂದಿಗೆ ನಮ್ಮ ಬಾಲ್ಯ ಬೆಸೆದುಕೊಂಡಿದೆ. ಇಂದಿನ ಮಕ್ಕಳಿಗೆ ಇದೆಲ್ಲಾ ಇಂಟರ್ ನೆಟ್ಟಲ್ಲಿ ಡೌನ್ ಲೋಡ್ ಗೆ ಸಿಗುವ ಸಾಪ್ಟ್ ಕಾಪಿಗಳು. ವಿಡಿಯೋ ಗೇಮುಗಳು, ಕಾರ್ಟೂನು ನೆಟ್ವರ್ಕು, ನ್ಯಾಷನಲ್ ಜಿಯಾಗ್ರಫಿ ಚಾನೆಲ್ಲಿನಲ್ಲಿ ಹಾಗೂ ಇಂಗ್ಲಿಷ್ ಸಿನೆಮಾನಲ್ಲಿ ತೋರಿಸುವ ಯಾವುದೋ ಗ್ರಹದ ಜೀವಿಗಳು. ನೋಡಿರುವ ಪ್ರಾಣಿ ಪಕ್ಷಿಗಳೆಂದರೆ ಕಾಗೆ ಮತ್ತು ನಾಯಿ!! ಹತ್ತು ಮಕ್ಕಳನ್ನು ನೀವೇ ಮಾತನಾಡಿಸಿ ನೋಡಿ... ಕುತೂಹಲಕ್ಕೆ!

ಬಾಲ್ಯದಲ್ಲಿ ನಾವು ಕೇಳಿದ ನೀತಿ ಕಥೆಗಳನ್ನು ಈಗ ಮತ್ತೊಮ್ಮೆ ನಾವು ನೆನಪಿಸಿಕೊಂಡರೆ, ನಮ್ಮ ಮಕ್ಕಳಿಗೆ ಒಂದಷ್ಟು ಕಥೆ ಹೇಳಲು ಸರಕಿರುತ್ತದೆ ಮತ್ತು ನಮ್ಮನ್ನು ಬಾಲ್ಯಕ್ಕೊಯ್ಯುತ್ತದೆ... ನಾವೇ ತಪ್ಪು ಹೆಜ್ಜೆ ಇಟ್ಟಾಗ ಚಾಟಿಯಾಗುತ್ತದೆ... ಸರಿದಾರಿ ತೋರುವ ಗುರುವಾಗುತ್ತದೆ...

ಈ ನೀತಿಕಥೆಗಳಿಗೆ ಅಂಥಾ ಶಕ್ತಿ ಖಂಡಿತಾ ಇದೆ ಎಂದು ನಂಬಿದ್ದೇನೆ.

ಹೀಗೆ ಆಗಾಗ ಮಧ್ಯೆ ಒಂದೊಂದು ಹಳೆಯ, ಪರಿಸರ, ಪಕ್ಷಿ ಮತ್ತು ಪ್ರಾಣಿಗಳ ಪಾತ್ರ ಹೊಂದಿರುವ ನೀತಿಕಥೆಗಳನ್ನು ಪ್ರಕಟಿಸುತ್ತೇನೆ...

ಕೋತಿ ಮತ್ತು ಮೊಸಳೆ
ಒಂದಾನೊಂದು ಕಾಲದಲ್ಲಿ, ಹಚ್ಚ ಹಸುರಾದ ಕಾಡಿನಲ್ಲಿ ಒಂದು ನೇರಳೆಯ ಮರವಿತ್ತು. ಹಣ್ಣುಗಳಿಂದ ತುಂಬಿದ ಅದನ್ನು ಕೋತಿಯೊಂದು ತನ್ನ ಮನೆಯನ್ನಾಗಿ ಮಾಡಿಕೊಂಡಿತ್ತು. ಆ ಕೋತಿಯು ತುಂಬಾ ಬುದ್ದಿವಂತ ಹಾಗೂ ಸಾಧು ಸ್ವಭಾವದ ಕೋತಿ. ಅದರ ವರ್ತನೆಯು ಎಲ್ಲಾ ಪ್ರಾಣಿಗಳಿಗೂ ಇಷ್ಟವಾಗುತಿತ್ತು. ಆ ಮರದ ಬಳಿಯೇ ಒಂದು ನದಿ ಹರಿಯುತ್ತಿತ್ತು. ಆ ಹೊಳೆಯಲ್ಲಿ ಮಕರವೆಂಬ ಮೊಸಳೆಯು ವಾಸ ಮಾಡುತ್ತಿತ್ತು.

ಒಂದು ದಿನ ಆ ಮರದ ಹತ್ತಿರ ಬಂದ ಮೊಸಳೆಯು ಮೇಲೆ ಕುಳಿತಿದ್ದ ಕೋತಿಯನ್ನು ನೋಡಿ "ಓ ಮಂಗಣ್ಣನೇ ನಿನ್ನ ಹೆಸರೇನು?" ಎಂದಿತು. "ನನ್ನ ಹೆಸರು ಹನುಮ ಎನ್ನುತ್ತಾರೆ, ನಿನ್ನ ಹೆಸರೇನು ಹೇಳು" ಎಂದಿತು. ಆಗ ಮೊಸಳೆಯು "ನನ್ನ ಹೆಸರು ಮಕರ, ನಾನು ಈ ನದಿಯ ಆ ದಡದಲ್ಲಿ ವಾಸಿಸುತ್ತೇನೆ. ನನ್ನ ಆಹಾರಕ್ಕಾಗಿ ಇಲ್ಲಿಗೆ ಬಂದಿರುವೆ" ಎಂದಿತು. ಆಗ ಹನುಮನು "ನೀನು ಆಹಾರವನ್ನು ಹುಡುಕಿಕೊಂಡು ಬಂದಿರುವೆಯಾ? ದೇವರ ದಯದಿಂದ ಇಲ್ಲಿ ನನಗೆ ಆಹಾರದ ಕೊರತೆ ಇಲ್ಲ. ಬೇಕಾದಷ್ಟು ಹಣ್ಣುಗಳು ಇವೆ. ಈ ರುಚಿ ರುಚಿಯಾಗಿರುವ ಹಣ್ಣನ್ನು ನೀನೂ ತಿನ್ನಲು ಇಚ್ಚಿಸುವೆಯಾ? ಬೇಕಾದಲ್ಲಿ ತುಂಬಾ ಕಿತ್ತುಕೊಡುವೆ ಎಂದು ಹೇಳಿತು. ಉತ್ತರವಾಗಿ ಮೊಸಳೆಯು ಅದರ ರುಚಿಯ ಬಗ್ಗೆ ತಾನೂ ಕೇಳಿರುವುದಾಗಿ ಹೇಳಿತು. ಕೋತಿಯು ಸ್ವಲ್ಪ ಹಣ್ಣುಗಳನ್ನು ಕಿತ್ತು ಮೊಸಳೆಯ ಕಡೆಗೆ ಎಸೆಯಿತು. ಅವುಗಳನ್ನು ಸವಿದ ಮೊಸಳೆಯು "ಆಹಾ! ನಾನು ಇದುವರೆಗೆ ತಿಂದ ಹಣ್ಣುಗಳಲ್ಲಿ ಇದೇ ಬಹಳ ರುಚಿ!" ಎಂದಿತು. ಸಂತಸಗೊಂಡ ಹನುಮನು ಮತ್ತಷ್ಟು ಹಣ್ಣುಗಳನ್ನು ಮೊಸಳೆಗೆ ನೀಡಿತು. ಅದನ್ನು ತಿಂದ ಮೊಸಳೆಯು ತಾನು ಪುನಃ ಬಂದು ಈ ಹಣ್ಣುಗಳ ರುಚಿ ನೋಡಬಹುದೇ ಎಂದಿತು. ಕೋತಿಯು "ಖಂಡಿತವಾಗಿ, ಯಾವಾಗ ಬಂದರೂ ನಿನಗೆ ಬೇಕಾದಷ್ಟು ಹಣ್ಣು ಸಿಗುವುದು ಬಾ!" ಎಂದಿತು. ಮೊಸಳೆಯು ಆನಂದದಿಂದ ತನ್ನ ಮನೆಗೆ ಹಿಂತಿರುಗಿತು.

ಆ ದಿನದಿಂದ ಅವೆರಡೂ ಉತ್ತಮ ಸ್ನೇಹಿತರಾದವು. ಪ್ರತಿ ದಿನವೂ ಮೊಸಳೆಯು ಮರದ ಬಳಿ ಬಂದು ಹಣ್ಣನ್ನು ತಿಂದು ಕೋತಿಯ ಜೊತೆ ಕಾಲ ಕಳೆದು ಹೋಗುತ್ತಿತ್ತು.

ಒಂದು ದಿನ ಕೋತಿಯು ಸ್ನೇಹಿತನನ್ನು ಅದರ ಸಂಸಾರದ ಬಗ್ಗೆ ವಿಚಾರಿಸಿತು. ಆಗ ಮೊಸಳೆಯು ತನ್ನ ಹೆಂಡತಿಯೊಬ್ಬಳನ್ನೇ ಮನೆಯಲ್ಲಿ ಬಿಟ್ಟಿರುವುದಾಗಿ ತಿಳಿಸಿತು. ಆಗ ಕೋತಿಯು "ನಿನ್ನ ಹೆಂಡತಿಗೇಕೆ ಹಣ್ಣನ್ನು ತೆಗೆದುಕೊಂಡು ಹೋಗಬಾರದು" ಎನ್ನಲು ಮೊಸಳೆಯು ಒಪ್ಪಿ ಸ್ವಲ್ಪ ಹಣ್ಣನ್ನು ಹೆಂಡತಿಗೂ ಒಯ್ದಿತು. ಈ ಹಣ್ಣುಗಳ ರುಚಿ ಮೊಸಳೆಯ ಹೆಂಡತಿಯು ಚಪ್ಪರಿಸುತ್ತಾ, ಈ ಹಣ್ಣು ನಿನಗೆ ಎಲ್ಲಿ ಸಿಕ್ಕಿತು ಎಂದು ಪ್ರಶ್ನಿಸಲು, ಮೊಸಳೆಯು ತನ್ನ ಸ್ನೇಹಿತನಾದ ಹನುಮನು ದಿನಾಗಲೂ ಇದನ್ನೇ ಸೇವಿಸುವುದಾಗಿ ತಿಳಿಸಿ ತನಗೂ ಕೊಡುತ್ತದೆ ಎಂದು ಹೇಳಿತು.

ಸ್ವಲ್ಪ ಅತ್ಯಾಸೆಯ ಸ್ವಭಾವದ ಆ ಹೆಣ್ಣು ಮೊಸಳೆಯು ದಿನಾಗಲೂ ಹಣ್ಣನ್ನು ತಿಂದು ಆ ಕೋತಿಯ ಮಾಂಸ ಬಹಳ ರುಚಿಯಾಗಿರಬೇಕೆಂದು ಮನಸ್ಸಿನಲ್ಲೇ ಲೆಕ್ಕ ಹಾಕಿತು. ಒಂದು ದಿನ ಎಂದಿನಂತೆ ಮನೆಗೆ ಬಂದ ಮೊಸಳೆಗೆ ತನ್ನ ಹೆಂಡತಿಯು ನರಳುತ್ತಾ ಒಂದು ಮೂಲೆಯಲ್ಲಿ ಮಲಗಿರುವುದು ಕಂಡಿತು. ಆಗ ವಿಚಾರಿಸಲು ಹೆಂಡತಿಯು "ನನಗೆ ಅಸಾಧ್ಯವಾದ ತಲೆನೋವು ಬಂದಿದೆ. ವ್ಯೆದ್ಯರ ಬಳಿ ಹೋಗಿದ್ದೆ. ಕೋತಿಯ ಹೃದಯವನ್ನು ತಿಂದರೆ ಈ ನೋವು ವಾಸಿ ಆಗುವುದಂತೆ. ಇಲ್ಲದಿದ್ದರೆ ಬದುಕುವುದಿಲ್ಲ ಎಂದು ಹೇಳಿದ್ದಾರೆ. ನನ್ನನ್ನು ಸಾಯಲು ಬಿಡುತ್ತೀಯಾ ಎಂದು ಹೇಳಿ ಮತ್ತೆ "ಕೋತಿಗಳು ನಮ್ಮ ಸ್ನೇಹಿತರಾಗಲು ಸಾಧ್ಯವೇ? ಅವು ಹಿಂದಿನಿಂದಲೂ ನಮ್ಮ ಆಹಾರವಲ್ಲವೆ?" ಎಂದು ಪ್ರಶ್ನಿಸಿತು.

ಆಗ ಮಕರವು ಛೇ! ಖಂಡಿತಾ ಇದು ನನ್ನಿಂದ ಸಾಧ್ಯವಿಲ್ಲ. ಅದೂ ಅಲ್ಲದೆ ಈ ಕಾರಣಕ್ಕೆ ಯಾರು ಬರುತ್ತಾರೆಂದು ಹೇಳಿ ಒಪ್ಪಲಿಲ್ಲ. ಇಷ್ಟಕ್ಕೇ ಬಿಡದ ಅದರ ಹೆಂಡತಿಯು ತಮ್ಮ ಮನೆಯಲ್ಲಿ ಭೋಜನದ ನೆವದಲ್ಲಿ ಕರೆಯಬೇಕೆಂದು ಸೂಚಿಸಿತು. ಇದಕ್ಕೆ ಒಪ್ಪಿದ ಮಕರವು ತನ್ನ ಸ್ನೇಹಿತ ಹನುಮನ ಬಳಿಗೆ ಹೋಗಿ ತನ್ನ ಹೆಂಡತಿಯು ಅದನ್ನು ಆಹ್ವಾನಿಸಿರುವುದನ್ನು ತಿಳಿಸಿತು. ಆಗ ಕೋತಿಯು "ನಾನು ಈಜು ಕಲಿತಿಲ್ಲ. ನಿಮ್ಮ ಮನೆಗೆ ಹೇಗೆ ಬರಲಿ" ಎಂದು ತಿಳಿಸಿತು. ಆಗ ಮೊಸಳೆಯು ಅದನ್ನು ತನ್ನ ಮೇಲೆ ಕೋರಿಸಿಕೊಂಡು ಕರೆದುಕೊಂಡು ಹೋಗುವುದಾಗಿ ತಿಳಿಸಿತು. ಕೋತಿಯು ಸ್ನೇಹಿತನ ಹೆಂಡತಿಯ ಆಸೆಯನ್ನು ಪೂರೈಸಲು ಮೊಸಳೆಯ ಬೆನ್ನ ಮೇಲೆ ಕುಳಿತು ಹೊರಟಿತು.

ಹೊಳೆಯ ಮಧ್ಯಭಾಗಕ್ಕೆ ಬಂದಾಗ ಮೊಸಳೆಯು ಏಕೋ ಮಂಕಾಗಿರುವುದನ್ನು ಗಮನಿಸಿದ ಕೋತಿಯು ಮೊಸಳೆಯನ್ನು ಏಕೆಂದು ಕೇಳಿತು. ಆಗ ಮೊಸಳೆಯು "ನನ್ನ ಹೆಂಡತಿ ಮೈಸರಿಯಿಲ್ಲ. ಅದಕ್ಕೋಸ್ಕರ ಅವಳು ನಿನ್ನ ಹೃದಯವನ್ನು ತಿನ್ನಬೇಕಂತೆ. ಇಲ್ಲದಿದ್ದಲ್ಲಿ ಅವಳು ಬದುಕುವುದಿಲ್ಲ" ಎಂದಿತು.

ತಕ್ಷಣವೇ ಅಪಾಯವನ್ನು ತಿಳಿದುಕೊಂಡ ಜಾಣ ಕೋತಿಯು "ಈಗ ತಾನು ಮೊಸಳೆಯ ಮನೆಗೆ ಹೋದಲ್ಲಿ ತನ್ನ ಜೀವವು ಹೋದಂತೆಯೇ" ಎಂದು ಯೋಚಿಸಿತು. ಉಪಾಯದಿಂದಲೇ ತಪ್ಪಿಸಿಕೊಳ್ಳಬೇಕೆಂದು ಅದು ನಿರ್ಧರಿಸಿತು. "ಅಯ್ಯೋ ಮಿತ್ರನೇ, ಇದನ್ನು ಹೇಳಲು ಇಷ್ಟು ಹಿಂಜರಿಕೆಯೇ? ಇದನ್ನು ಮೊದಲೇ ಹೇಳಬಾರದಿತ್ತೇ? ನನಗೇನು ಗೊತ್ತು! ನಾನು ನನ್ನ ಹೃದಯವನ್ನು ಅಲ್ಲೇ ಮರದ ಕೊಂಬೆಗೆ ನೇತು ಹಾಕಿದ್ದೆ. ಹೇಳಿದ್ದರೆ ಜೊತೆಯಲ್ಲೇ ತಂದುಬಿಡುತ್ತಿದ್ದೆ. ಈಗ ಮತ್ತೇ ಅಷ್ಟು ದೂರ ನೀನು ಈಜುವಂತೆ ಆಯಿತಲ್ಲ" ಎಂದು ವಿಷಾದವನ್ನು ಅಭಿನಯಿಸಿತು.

ಇದನ್ನು ನಂಬಿದ ಮೊಸಳೆಯು ಮತ್ತೆ ಮರದ ಹಿಂತಿರುಗಿತು. ದಡ ಸಿಕ್ಕಿದ ಕೂಡಲೇ ಹನುಮನು ಮರಕ್ಕೆ ನೆಗೆದು "ಅಯ್ಯೋ ಮೂರ್ಖ ಮೋಸಳೆಯೇ, ಎಲ್ಲಾದರೂ ಹೃದಯವನ್ನು ದೇಹದಿಂದ ತೆಗೆದಿಡಲು ಆಗುತ್ತದೆಯೇ? ಮೋಸಕ್ಕೆ ತಕ್ಕ ಉಪಾಯ ಹೂಡಿದೆ ಅಷ್ಟೆ. ನನ್ನ ನಿನ್ನ ಸ್ನೇಹ ಇಂದಿಗೇ ಮುಗಿಯಿತು, ಮತ್ತೆ ಮುಖ ತೋರಿಸಬೇಡ" ಎಂದು ಹೇಳಿ ಎಂದಿನಂತೆ ತಾನು ಮರದಲ್ಲಿ ಹಣ್ಣುಗಳನ್ನು ಸವಿಯುತ್ತಾ ಸುಖವಾಗಿತ್ತು, ಮೂರ್ಖ ಮೊಸಳೆಯು ತನ್ನ ದಡ್ಡತನದಿಂದ ಒಳ್ಳೆಯ ಸ್ನೇಹವನ್ನು ಕಳೆದುಕೊಂಡಿತು.

- ನೀತಿ: ಒಳ್ಳೆಯ ಸ್ನೇಹವನ್ನು ಮಾಡಬೇಕು.
- ನೀತಿ: ಮಿತ್ರ ದ್ರೋಹ ಮಾಡಬಾರದು
- ನೀತಿ: ಅಪಾಯ ಬಂದಾಗ ಉಪಾಯಮಾಡು.
- ನೀತಿ: ಅತಿ ಆಸೆ ಗತಿ ಕೇಡು.

ದರೋಜಿ ಕರಡಿ ಧಾಮ - ಕಮಲಾಪುರ (Daroji Bear Sanctuary)

2008-07-10T05:23:00.000-07:00

ಬಳ್ಳಾರಿ ಜಿಲ್ಲೆ ಎಂದಾಕ್ಷಣ ನಮಗೆ ಕಣ್ಣಮುಂದೆ ಬರುವುದು, ಹಂಪಿಯ ಭವ್ಯ ಕಲಾವೈಭವ, ವಿಜಯನಗರ ಸಾಮ್ರಾಜ್ಯದ ಪಳೆಯುಳಿಕೆ, ಗಣಿಗಾರಿಕೆ ಹಾಗೂ ಬಿರು ಬಿಸಿಲು! ಆದರೆ, ಇವುಗಳ ಜೊತೆಗೆ ಬಳ್ಳಾರಿ ಜಿಲ್ಲೆಯು ಇನ್ನು ಎಷ್ಟೋ ಅಗಾಧ ಪ್ರಾಕೃತಿಕ ಸಂಪತ್ತನ್ನು ತನ್ನ ಒಡಲಲ್ಲಿ ಬಚ್ಚಿಟ್ಟುಕೊಂಡಿದೆ. ಬಳ್ಳಾರಿಗೆ ರಾಜ್ಯದಲ್ಲಿ ಬೇರೆ ಎಲ್ಲಾ ಜಿಲ್ಲೆಗಳಿಗಿಂತ ಬೇರೆಯದೇ ರೀತಿಯ ವಿಶೇಷತೆ ಇದೆ.

ಇಷ್ಟೋಂದು ವೈಶಿಷ್ಟ್ಯ, ಸೊಬಗನ್ನು ತನ್ನ ಒಡಲಲ್ಲಿ ಇಟ್ಟುಕೊಂಡಿರುವ ಬಳ್ಳಾರಿಯಲ್ಲಿ ಇನ್ನೂ ಒಂದು ವೈಶಿಷ್ಟ್ಯವಿದೆ. "ಕರಡಿ ಧಾಮ" Bear Sanctuary; ಹೊಸಪೇಟೆಯ ಕಮಲಾಪುರದ ಬಳಿ ಇರುವ "ದರೋಜಿ ಕರಡಿ ಧಾಮ" Daroji Bear Sanctuary ಈ ಕರಡಿ ಧಾಮ ಹೆಚ್ಚಿನ ಮಂದಿಗೆ ತಿಳಿದಿಲ್ಲ, ಜೊತೆಗೆ ಇದರ ವಿಶೇಷತೆ ಮತ್ತು ಪ್ರಾಮುಖ್ಯತೆಯೂ ತಿಳಿದಿಲ್ಲ. ರಾಜ್ಯದಲ್ಲಿ ಎಲ್ಲಿಯೂ ಕರಡಿಗಳಿಗಾಗಿಯೇ ಪ್ರತ್ಯೇಕ ಧಾಮವಿಲ್ಲ. ಇದು ಬಳ್ಳಾರಿಯ ವಿಶೇಷ!

ಅಕ್ಟೋಬರ್ 1994 ರಲ್ಲಿ ರಾಜ್ಯ ಸರ್ಕಾರ 5,587 ಎಕರೆ ಪ್ರದೇಶದ ಬಿಳಿಕಲ್ಲು ಸಂರಕ್ಷಿತ ವನ ಎಂದು ಕರೆಸಿಕೊಳ್ಳುತ್ತಿದ್ದ ಪ್ರದೇಶವನ್ನು ಧರೋಜಿ ಕರಡಿ ಧಾಮ ಎಂದು ಘೋಷಿಸಿ, ಕರಡಿಗಳನ್ನು ರಕ್ಷಿಸಿಕೊಂಡು ಬಂದಿದೆ. ಇಲ್ಲಿ ಸುಮಾರು 120 ಕರಡಿಗಳು ಇಲ್ಲಿ ವಾಸಿಸುತ್ತಿವೆ. ರಾಶಿ ರಾಶಿ ಬಂಡೆಗಳಿಂದ ಸೃಷ್ಟಿಯಾದ ಬೆಟ್ಟಗಳಲ್ಲಿ ನೈಸರ್ಗಿಕವಾಗಿ ರೂಪುಗೊಂಡ ಗುಹೆಗಳಲ್ಲಿ ಈ ಕರಡಿಗಳ ವಾಸ ಮತ್ತು ಸಂತಾನಾಭಿವೃದ್ದಿ. ಆಹಾರಕ್ಕಾಗಿ ಈ ಕರಡಿಗಳು ಗುಹೆಗಳಿಂದ ಇಳಿದು ಕಾಡಿನೊಳಕ್ಕೆ ಬರುತ್ತವೆ. ಈ ಕರಡಿಧಾಮದಲ್ಲಿ ಕರಡಿಯ ಜೊತೆಗೆ ಚಿರತೆ, ತೋಳ, ನರಿ, ಕಾಡು ಹಂದಿ, ಮುಳ್ಳಂದಿ, ಪಂಗೋಲಿನ್, ನಕ್ಷತ್ರ ಆಮೆ, ಉಡ, ಮುಂಗುಸಿ, ನವಿಲು, ಕಾಡು ಕೋಳಿಗಳು ಇನ್ನೂ ಎಷ್ಟೊ ಪ್ರಾಣಿ ಸಂಕುಲಗಳನ್ನು ತನ್ನಲ್ಲಿ ಅಡಗಿಸಿಕೊಂಡು ಸಂರಕ್ಷಿಸುತ್ತಾ ಬಂದಿದೆ. 90 ಕ್ಕೂ ಹೆಚ್ಚು ಜಾತಿಯ ಪಕ್ಷಿ ಪ್ರಬೇಧಗಳು ಇವೆ ಮತ್ತು 27 ಕ್ಕೂ ಹೆಚ್ಚು ವಿಧದ ಚಿಟ್ಟೆಗಳು ಇವೆ.

ಕಳೆದ 2008 ಮಾರ್ಚಿ ತಿಂಗಳಲ್ಲಿ ನಾನು ಮತ್ತು ಲೋಕೇಶ್ ಮೊಸಳೆ ದರೋಜಿ ಕರಡಿ ಧಾಮಕ್ಕೆ ಭೇಟಿ ನೀಡಿ ಅಲ್ಲಿ 4 ದಿನಗಳನ್ನು ಕಳೆದು ಬಂದೆವು. 4 ದಿನಗಳಲ್ಲಿ 2 ದಿನ ದರೋಜಿ ಕರಡಿ ಧಾಮದಲ್ಲಿ ಕಳೆದರೆ ಮತ್ತೆರಡು ದಿನ ಹಂಪಿಯ ಸೌಂದರ್ಯ ಸವಿದೆವು. ದರೋಜಿ ಕರಡಿ ಧಾಮದ ಸಂರಕ್ಷಣೆಗಾಗಿ, ಅಲ್ಲಿನ ಯುವಕರು ಸ್ವಯಂಪ್ರೇರಿತರಾಗಿ ಕರಡಿ ಮತ್ತು ಕರಡಿ ಧಾಮದ ರಕ್ಷಣೆಗಾಗಿ ಹೋರಾಡುತ್ತಿದ್ದಾರೆ ಮತ್ತು ಗದ್ದಲವಿಲ್ಲದೆ ತಮ್ಮ ಸೇವೆಸಲ್ಲಿಸುತ್ತಿದ್ದರೆ. ಅಂಥವರಲ್ಲಿ ಪ್ರಮುಖರು ಕಮಲಾಪುರದ ಪಂಪಾಸ್ವಾಮಿಯವರು ಮತ್ತು ಅವರ ಹತ್ತು ಗೆಳೆಯರು.

ದರೋಜಿ ಪ್ರವಾಸಿ ಮಂದಿರ
ಕಮಲಾಪುರದಿಂದ ಸುಮಾರು 6 ಕಿ.ಮೀ ದೂರದಲ್ಲಿನ ಪ್ರಶಾಂತ ವಾತಾವರಣದಲ್ಲಿ ದರೋಜಿ ಪ್ರವಾಸಿ ಮಂದಿರ ಇದೆ. ಅಲ್ಲಿನ ವಿಶಾಲ ಪ್ರದೇಶದಲ್ಲಿ ಗಿಡ ಮರಗಳ ಮದ್ಯೆ ನಿರ್ಮಿಸಿರುವ ಪ್ರವಾಸಿ ಮಂದಿರ ನಿಜಕ್ಕೂ ಸುಂದರ. ಅಲ್ಲಿ ಚಾರಣ (trekking) ಮಾಡಲು ಹಾದಿ ನಿರ್ಮಿಸಿದ್ದಾರೆ. Tent House ಗಳು ಸಹ ಇದೆ. ಮುಂಜಾನೆ ಎದ್ದು ಈ ದರೋಜಿ ಪ್ರವಾಸಿ ಮಂದಿರದಲ್ಲಿ ಹಾಗೇ ಒಮ್ಮೆ ಸುತ್ತಿ ಬಂದರೆ ಹಾಯ್! ಎನಿಸುತ್ತದೆ. ಮುಂಜಾನೆ ಕೊಂಚ ಬೇಗ ಎದ್ದರೆ ಪಕ್ಷಿಗಳ ಜಾತ್ರೆಯೇ ನೋಡಲು ಸಿಗುತ್ತದೆ! ತುಂಬಾ ಸುಸಜ್ಜಿತವಾಗಿ ಪ್ರಕೃತಿ ಪ್ರಿಯರಿಗೆ ಅನುಕೂಲಕರ ರೀತಿಯಲ್ಲಿ ಪ್ರವಾಸಿ ಮಂದಿರವನ್ನು ಅಚ್ಚುಕಟ್ಟಾಗಿ ನಿರ್ಮಿಸಿದ್ದಾರೆ.

ದರೋಜಿ ಪ್ರವಾಸಿ ಮಂದಿರದಲ್ಲೇ ಆರಾಮವಾಗಿ ಒಂದು ದಿನ ಕಳೆಯಬಹುದು!

ಮುಂದೆ...

ಗೆಳೆಯರಾದ ಪಂಪಾಸ್ವಾಮಿಯವರ ಸಹಾಯದಿಂದ ನಮ್ಮ ಕರಡಿ ಬೇಟೆಯನ್ನು ದರೋಜಿ ಪ್ರವಾಸಿ ಮಂದಿರದಿಂದ ಪ್ರಾರಂಭಿಸಿದೆವು. ಬೆಳಗ್ಗೆ ಬೇಗ ಎದ್ದು ಎಲ್ಲಾ ತಯಾರಿಯೊಂದಿಗೆ ಸುಮಾರು 6 ರಿಂದ 7 ಕಿ.ಮೀ ದೂರವಿರುವ ಕರಡಿ ಧಾಮಕ್ಕೆ ಹೊರಟೆವು, ಕರಡಿ ಧಾಮ ಪ್ರವೇಶಿಸುತ್ತಿದ್ದಂತೆ ಅಲ್ಲಿನ ಪ್ರಶಾಂತತೆ, ಅಲ್ಲಲ್ಲಿ ಪಕ್ಷಿಗಳ ಟಿವ್... ಟಿವ್... ಕುಕ್ಕೂ... ಕುಕ್ಕೂ... ಸ್ವಾಗತಿಸುತ್ತಿತ್ತು. ಮುಂದೆ ಸಾಗಿ ಕರಡಿಧಾಮದ Watch tower ತಲುಪಿದೆವು. ಇನ್ನು ನಿರ್ಮಾಣ ಹಂತದಲ್ಲಿರುವ Watch tower ಸ್ಥಳದಲ್ಲಿ ನಿಂತರೆ ಕರಡಿಧಾಮದ ಪೂರ್ಣ ನೋಟ ಕಾಣಬಹುದು. ಧಾಮದ ಕಾಡಿನ ಹಿಂದೆ ದೊಡ್ಡ ದೊಡ್ಡ ಬಂಡೆಯ ಬೆಟ್ಟಗಳು, ಅಲ್ಲಿ ಎಲ್ಲೋ ದೂರದಲ್ಲಿ ಕರಿ ಮೆಣಸು ಉರುಳಿ ಬೀಳತ್ತಿರುವಂತೆ ಕಾಣುವ ಕರಡಿಗಳು!! ಕಾಡಿನ ಯಾವುದೋ ಸಂದುಗಳಿಂದ ನವಿಲಿನ ಕಾವ್... ಕಾವ್... ಸದ್ದು, ನಿಜಕ್ಕೂ ಸ್ವರ್ಗ!

ಅಲ್ಲಿಂದ ಪ್ರಯಾಣ ಮುಂದುವರಿಸಿ Core Area ತಲುಪಿದೆವು, ಕರಡಿಗಳು ಇಲ್ಲಿಗೆ ಪ್ರತಿ ದಿನ ಭೇಟಿ ನೀಡುತ್ತವೆ. ಅಲ್ಲಿ ನಾವು ಅಡಗಿ ಕುಳಿತು ಕರಡಿಗಾಗಿ ಕಾಯತೊಡಗಿದೆವು. ಸ್ವಲ್ಪ ಸಮಯದಲ್ಲೆ ಎಂದಿನ ತಮ್ಮ ಹಾದಿಯಲ್ಲಿ ಕರಡಿಗಳ ಗುಂಪೊಂದು ಬಂತು, ಈ ಹಿಂದೆ ಎಂದೂ ಕರಡಿಗಳನ್ನು ಅಷ್ಟು ಸನಿಹದಿಂದ ನೋಡಿರದ ನನಗೆ ಒಳಗೆ ಭಯ ಪ್ರಾರಂಭವಾಯಿತು. ಇದರ ನಡುವೆಯೆ ಸುಮಾರು ಚಿತ್ರಗಳನ್ನು ಕ್ಲಿಕ್ಕಿಸಿದೆ. ಈಗೆಯೇ ಬಂಡೆಗಳ ಸಂದುಗಳಿಂದ ಸಂಜೆಯವರೆಗೂ ಕರಡಿಗಳ ಆಗಮನ ಮತ್ತು ನಿರ್ಗಮನ ನಿರಂತರವಾಗಿತ್ತು. ಮದ್ಯೆ, ನವಿಲುಗಳು, ಮುಂಗುಸಿ, ಕಾಡು ಕೋಳಿಗಳು, ಕಾಡು ಹಂದಿ ಮತ್ತು ಹಲವಾರು ಪಕ್ಷಿಗಳ ಆಗಮನ ಖುಷಿ ತಂದಿತ್ತು. ಸಂಜೆ 5.30 ರವರೆಗೆ ನಮ್ಮ ಛಾಯಾಚಿತ್ರ ಬೇಟೆ ಮುಂದುವರೆದಿತ್ತು. ನಂತರ ಕತ್ತಲಾದಂತೆ ನಮ್ಮ ಅಡಗು ತಾಣದಿಂದ ಹೊರಟೆವು. ಬೆಳಗ್ಗೆಯಿಂದ ಕಾರಿನೊಳಗೆ ಕೂತು ಸುಸ್ತಾಗಿತ್ತು, ಜೊತೆಗೆ ಜೋರು ಬಿಸಿಲು. ಆದರೂ ಕ್ಲಿಕ್ಕಿಸಿದ ಎಷ್ಟೊ ಚಿತ್ರಗಳನ್ನು ನೋಡಿ ಸಂತಸ ಪಡುವಾಗ ಒಂದು ರೀತಿಯ ಸಮಾಧಾನ ಭಾವ, ಇದರ ನಡುವೆ ಎಲ್ಲಾ ಕಷ್ಟ, ಸುಸ್ತು ಮತ್ತು ಬಿಸಿಲ ತಾಪ ಮರೆತು ಹೋಗುತ್ತಿತ್ತು. ಇದೇ ಸಂತಸದೊಂದಿಗೆ ಕತ್ತಲಾಗುತ್ತಿದ್ದಂತೆ ಪ್ರವಾಸಿ ಮಂದಿರ ಸೇರಿದೆವು.

ಮತ್ತೆ ಮುಂಜಾನೆ ಯತಾವತ್ ಬೇಗ ಎದ್ದು ಕರಡಿಧಾಮದ Core Area ಸೇರಿಕೊಂಡೆವು. ಸಂಜೆಯವರೆಗೂ ಬರಿ ಕ್ಲಿಕ್... ಕ್ಲಿಕ್... ಕ್ಲಿಕ್...

ಕರಡಿಗಳ ಬಗ್ಗೆ ಮತ್ತೊಂದಷ್ಟು ಮಾಹಿತಿ:
ಪ್ರಪಂಚದಲ್ಲಿ 8 ಜಾತಿಯ ಕರಡಿಗಳಿದ್ದು, Indian Sloth Bear ಎಂದು ಕರೆಸಿಕೊಳ್ಳುವ ಕಪ್ಪು ಕೂದಲಿನ ಕತ್ತಿನ ಕೆಳಗೆ ಎದೆಭಾಗದಲ್ಲಿ ಬಿಳಿ ಅಥವಾ ಕೆನೆ ಬಣ್ಣದಲ್ಲಿ "V" ಅಥವಾ "U" ಆಕಾರದಲ್ಲಿ ವಿನ್ಯಾಸವಿರುವ ಈ ಕಾರಡಿಗಳು ಭಾರತ ಮತ್ತು ಶ್ರೀಲಂಕಾದಲ್ಲಿ ಮಾತ್ರ ವಾಸಿಸುತ್ತವೆ.

ಕರಡಿಯ ತಲೆಯು ಗಾತ್ರದಲ್ಲಿ ದೊಡ್ಡದಿದ್ದು, ಕಿವಿ ಮತ್ತು ಕಣ್ಣು ಸಣ್ಣದಾಗಿರುತ್ತದೆ. ಇವುಗಳಿಗೆ ಕಣ್ಣು ಮತ್ತು ಕಿವಿ ಮಂದವಾಗಿದ್ದು ಸೂಕ್ಷ್ಮ ಶ್ರವಣ ಹಾಗೂ ದೃಷ್ಟ ಇರುವುದಿಲ್ಲ. ಆದರೆ, ವಾಸನೆಗಳನ್ನು ಬಹಳ ಸೂಕ್ಷ್ಮವಾಗಿ ಗ್ರಹಿಸುವ ಶಕ್ತಿಯು ಚುರುಕಾಗಿರುತ್ತದೆ. ಕಂದು ಬಣ್ಣದ ಉದ್ದನೆಯ ಮೂತಿ ಮತ್ತು ತುಟಿಗಳು ಮೃದುವಾಗಿಯೂ ಹಾಗೂ ತುಂಬಾ ಹಗುರವಾಗಿಯೂ ಇರುತ್ತದೆ. ಇದರ ಸಹಾಯದಿಂದ ಕರಡಿಗಳು ಸುಲಭವಾಗಿ ಇರುವೆಗಳು ಮತ್ತು ಗೆದ್ದಲು ಹುಳುಗಳನ್ನು ತಿನ್ನಲು ಸಹಕಾರಿಯಾಗಿರುತ್ತದೆ. ಗಂಡು ಕರಡಿಗಳು ಸುಮಾರು 80-140 ಕೆಜಿಯಷ್ಟು ತೂಕವಿರುತ್ತದೆ. ಹೆಣ್ಣು ಕರಡಿಯು ಸುಮಾರು 55-95 ಕೆಜಿಯಷ್ಟು ತೂಕವಿರುತ್ತವೆ. ಸಾಮಾನ್ಯವಾಗಿ ಬೇಸಿಗೆಯಲ್ಲಿ ಸಂತಾನಾಭಿವೃದ್ದಿಯಲ್ಲಿ ತೊಡಗುತ್ತವೆ. ಈ ಸಂದರ್ಭದಲ್ಲಿ ಗಂಡು, ಹೆಣ್ಣುಗಳ ಮಧ್ಯೆ ಸಣ್ಣ ಜಗಳಗಳೂ ಸಾಮಾನ್ಯವಾಗಿರುತ್ತವೆ. ಸಾಮಾನ್ಯವಾಗಿ ಚಳಿಗಾಲದಲ್ಲಿ 2 ರಿಂದ 3 ಮರಿಗಳನ್ನು ಹೆರುತ್ತವೆ. ಆಗಿನ್ನು ಹುಟ್ಟಿದ ಮರಿಗಳು ತುಂಬಾ ಸಣ್ಣದಾಗಿ, ಕೂದಲುಗಳಿಲ್ಲದೆ ಮತ್ತು ಮೂರು ವಾರಗಳ ಕಾಲ ಮರಿಗಳಿಗೆ ಕಣ್ಣು ಕಾಣುವುದಿಲ್ಲ.. 2 ರಿಂದ 3 ವರ್ಷಗಳ ಕಾಲ ಮರಿಗಳನ್ನು ತಾಯಿ ಸಾಕುತ್ತದೆ.

ಕರಡಿಗಳು ತನ್ನ ಮರಿಗಳನ್ನು ಬೆನ್ನ ಮೇಲೆ ಕೂರಿಸಿಕೊಂಡು ಮುಂದೆ ಸಾಗುತ್ತದೆ. ಕರಡಿ ಮರಿಗಳು ತಾಯಿಯ ಸುತ್ತಾ ಆಡಿಕೊಂಡು ಓಡಾಡಿಕೊಂಡಿರುತ್ತದೆ ಮತ್ತು ತಾಯ್ ಬೆನ್ನ ಮೇಲೆ ಏರಲು ಪೈಪೋಟಿ ನೆಡೆಸುತ್ತವೆ. ಕರಡಿಗಳು ಸಾಮಾನ್ಯವಾಗಿ 40 ರಿಂದ 50 ವರ್ಷಗಳ ಕಾಲ ಬದುಕುತ್ತವೆ. ಸಾಮಾನ್ಯವಾಗಿ ಕರಡಿಗಳು ನಿಶಾಚರಿಗಳು! ಅತ್ಯುತ್ತಮವಾಗಿ ಮರ ಹತ್ತಬಲ್ಲವು ಮತ್ತು ಈಜಲೂ ಬಲ್ಲವು!!

ಆಹಾರ ಪದ್ದತಿ:
ಕರಡಿಗಳು ಪ್ರಮುಖವಾಗಿ ಹುಳುಗಳು, ಇರುವೆಗಳು ಮತ್ತು ಜೇನುತುಪ್ಪವನ್ನು ತಿನ್ನುತ್ತವೆ. ಹುಳುಗಳು ಮತ್ತು ಇರುವೆಗಳನ್ನು ತಿನ್ನಲು ತನ್ನ ಮೂತಿಯನ್ನು ಬಳಸುತ್ತವೆ. ಇರುವೆ ಗೂಡಿನೊಳಗೆ ಮೂಗಿನಿಂದ ಜೋರಾಗಿ ಗಾಳಿ ಬಿಟ್ಟು ದೂಳನ್ನು ಸರಿಸಿ ಬಾಯಿಂದ ಜೋರಾಗಿ ಎಳೆದುಕೊಂಡು ತಿನ್ನುತ್ತದೆ. ಇರುವೆ ಗೂಡಿನಲ್ಲಿ ಮೂತಿ ಇಟ್ಟು ಹೀರುವಾಗ ಜೋರದ ಶಬ್ದ ಬರುತ್ತದೆ. ಅದು ಸುಮಾರು 100 ಮೀಟರುಗಳ ದೂರದವರೆಗೂ ಕೇಳುತ್ತದೆ!

ಕರಡಿಗಳಿಗೆ ಜೇನುತುಪ್ಪ ಬಲು ಪ್ರೀತಿಯ ಆಹಾರ, ಜೇನುತುಪ್ಪ ರುಚಿಯನ್ನು ಸವಿಯಲು ಇವು ಮರವನ್ನು ಹತ್ತುತ್ತವೆ. ಮೈ ತುಂಬಾ ಕೂದಲುಗಳು ಇರುವುದರಿಂದ ಜೇನುಹುಳುಗಳ ವಿರೋಧ ಈ ಕರಡಿಗಳಿಗೆ ಲೆಕ್ಕಕ್ಕಿಲ್ಲ! ಕರಡಿಗಳು ರಸ ಭರಿತ ಹೂವುಗಳನ್ನು ತಿನ್ನುತ್ತವೆ. ಹಾಗೂ ಕಾಡಿನ ಎಷ್ಟೊ ಹಣ್ಣುಗಳನ್ನು ತಿನ್ನುತ್ತವೆ ಮತ್ತು ಹಣ್ಣುಗಳ ಬೀಜಗಳಲ್ಲಿ ಇರುವ "ಆಸಿಡ್" ಅಂಶ ಕರಡಿಗಳ "ಗ್ಯಾಸ್ಟ್ರಿಕ್" ಸಮಸ್ಯೆಗೆ ಔಷಧವಾಗಿದೆ. ಕರಡಿಗಳ ಮಲದ ಮೂಲಕ ಈ ಬೀಜಗಳು ಹೊರಬಂದು ಮಳೆಗಾಲದಲ್ಲಿ ಚಿಗುರಿ ಸಸ್ಯ ಕ್ರಾಂತಿಗೂ ಕಾರಣವಾಗುತ್ತದೆ.

ಮನುಷ್ಯ ಮತ್ತು ಕರಡಿಗಳು:
ಕರಡಿಗಳು ಸಾಮಾನ್ಯವಾಗಿ ರೋಷದಿಂದ ಇರುವುದಿಲ್ಲ. ಸೌಮ್ಯ ಸ್ವಭಾವದವು, ಮನುಷ್ಯರ ದ್ವನಿ ಕೇಳಿದರೆ ಅಥವಾ ಮನುಷ್ಯರ ವಾಸನೆ ಸಿಕ್ಕರೆ ಅಲ್ಲಿಂದ ದೂರ ಸರಿಯುತ್ತವೆ. ತೀರಾ ಜೀವ ಭಯ ಅಥವಾ ಅಪಾಯ ಅನಿಸಿದರೆ ಮಾತ್ರ ವ್ಯಾಘ್ರನಂತೆ ಮೇಲೆರಗುತ್ತವೆ.

ತಮ್ಮ ಬೆಳೆಗಳ ರಕ್ಷಣೆಗಾಗಿ ದಾಳಿಯ ಭಯದಿಂದ ಕೆಲವು ಹಳ್ಳಿಗಳ ರೈತರು ಕರಡಿಗಳನ್ನು ಕೊಲ್ಲುತ್ತಾರೆ. ಜೊತೆಗೆ ಮನುಷ್ಯನ ಜನಸಂಖ್ಯೆಯ ವಿಪರೀತ ಹೆಚ್ಚಳದಿಂದ, ಅರಣ್ಯ ನಾಶದಿಂದ, ಅರಣ್ಯ ಪ್ರದೇಶಗಳನ್ನು ಕೃಷಿ ಭೂಮಿಯಾಗಿ ಪರಿವರ್ತಿಸುತ್ತಿರುವುದರಿಂದ ಹಾಗೂ ಕಾಡಿನ ಜೇನು ಗೂಡುಗಳನ್ನು ಮತ್ತು ಹಣ್ಣು ಹಂಪಲುಗಳಂತಹ ಪದಾರ್ಥಗಳನ್ನು ಮನುಷ್ಯನ ದಾಹಕ್ಕೆ ಕಿತ್ತು ತಿನ್ನುತಿರುವುದರಿಂದ ಕರಡಿಗಳು ಬಲವಂತವಾಗಿ ಆಹಾರ ಹುಡುಕಿಕೊಂಡು ದೂರ ಸರಿಯುವಂತಾಗಿದೆ ಜೊತೆಗೆ ಸಂತತಿ ನಶಿಸುತ್ತಿದೆ.

ಈ ದೃಷ್ಟಿಯಿಂದಾಗಿ, ದರೋಜಿ ಕರಡಿ ಧಾಮವು ಕರಡಿಗಳ ರಕ್ಷಣೆಯಲ್ಲಿ ತೊಡಗಿ, ಪ್ರಕೃತಿ ಪ್ರಿಯರು ಮತ್ತು ಇತರರು ಹಳ್ಳಿಗಳಲ್ಲಿ ಅರಿವು ಮೂಡಿಸಿ ಅವರ ಸಹಕಾರದಿಂದ ಕರಡಿಗಳ ರಕ್ಷಣೆ ಮಾಡಿಕೊಂಡು ಬಂದಿದೆ.

ಖ್ಯಾತ ವನ್ಯಜೀವಿ ಛಾಯಗ್ರಾಹಕ ಮತ್ತು ಮಾಜಿ ಮಂತ್ರಿ ಶ್ರೀ . ವೈ. ಎಂ. ಘೋರ್ಪಡೆ ಅವರ ಮಾರ್ಗದಶನದಲ್ಲಿ ಈ ದರೋಜಿ ಕರಡಿ ಧಾಮವು ಪ್ರಾರಂಭಗೊಂಡಿದೆ. ಈ ಕರಡಿ ಧಾಮಕ್ಕೆ ಭೇಟಿ ನೀಡಲು ಆಗಸ್ಟ್ ನಿಂದ ಏಪ್ರಿಲ್ ಮದ್ಯೆ ಸೂಕ್ತ ಸಮಯ.

ದರೋಜಿ ಕರಡಿ ಧಾಮದ ಭೇಟಿಗೆ, ಮಾಹಿತಿಗೆ ಮತ್ತು ಸಹಾಯಕ್ಕೆ ಪಂಪಾಸ್ವಾಮಿಯವರನ್ನು ಭೇಟಿ ಮಾಡಬಹುದು. ದೂರವಾಣಿ ಸಂಖ್ಯೆ 9449136252

ಹೆಚ್ಚಿನ ಮಾಹಿತಿಗೆ: http://www.karnataka.com/sloth bear ಹಾಗೂ http://wikipedia.com ಭೇಟಿಮಾಡಿ.

ಕರಡಿಯ ವಿವಿದ ಭಾವ-ಭಂಗಿಗಳ ಚಿತ್ರ:

ಅಣ್ಣ, ಗುರು... ಲೋಕೇಶ್ ಮೊಸಳೆ

ಹಂಪಿ (Hampi)

ಪ್ರಸಿದ್ದ ಕಲ್ಲಿನ ರಥ

ತೆನಾಲಿ ಮಂಟಪದಿಂದ ಪೂರ್ಣ ಹಂಪಿಯ ವಿಹಂಗಮ ನೋಟ

ಪಂಪಾಸ್ವಾಮಿಯವರು ತಮ್ಮ ಸ್ನೇಹಿತರಾದ ವಿರೂಪಾಕ್ಷ ಅವರನ್ನು ಜೊತೆಮಾಡಿ ಹಂಪಿ ಸುತ್ತಾಟಕ್ಕೆ ಕಳುಹಿಸಿದರು. ವಿರೂಪಾಕ್ಷರವರು ನಮಗೆ ಪೂರ್ಣ ಹಂಪಿಯ ದರ್ಶನ ಮಾಡಿಸಿದರು. ಕಲ್ಲಿನ ರಥ, ಪುರಂದರ ದಾಸ ಮಂಟಪ, ಕಮಲಾ ಮಹಲ್, ರಾಣಿ ಸ್ನಾನ ಗೃಹ, ಬನ್ನಿ ಮಂಟಪ, ಪಾನ್ ಬಜಾರ್, ತೆನಾಲಿ ಮಂಟಪ, ವಿರೂಪಾಕ್ಷ ದೇವಸ್ಥಾನ ಇನ್ನೂ ಎಷ್ಟೊ ಸ್ಥಳಗಳನ್ನು ನೋಡಿದೆವು. ಸಾಮಾನ್ಯ ಪ್ರವಾಸಿಗರು ಹೋಗದ, ನೋಡದ ಅಥವಾ ನಿರ್ಲಕ್ಷಿಸುವ ಎಷ್ಟೊ ಸ್ಥಳಗಳ ಭೇಟಿ ಮಾಡಿಸಿದರು. ಹಂಪಿಯ ವಿಜಯ ನಗರ ಸಾಮ್ರಾಜ್ಯದ ಇಂದಿನ ಪಳೆಯುಳಿಕೆಗಳು, ಹಾಳಾದ ಕಟ್ಟಡಗಳು, ವಿಗ್ರಹಗಳು, ಊರು, ರಸ್ತೆ ಮತ್ತು ಅಂದು ಬಳಸುತ್ತಿದ್ದ ತಂತ್ರಙ್ಞಾನವನ್ನು ನೋಡಿದರೆ ಅಂದಿನ ವೈಭವವನ್ನು ನೆನೆದು ಹುಬ್ಬೇರಿಸುವಂತಾಗುತ್ತದೆ. ಹಂಪಿಯ ವೈಭವವೇ ಅಂತಹುದು, ಕಣ್ಣಳತೆ ಮೀರಿ ಹಾಯ್ದ ಬೆಟ್ಟಸಾಲು, ಎತ್ತ ತಿರುಗಿದರೂ ಬಂಡೆ, ಗೋಪುರ, ಮಂಟಪ, ವಿಗ್ರಹ... ಹಂಪಿಯಲ್ಲಿ ಅಲೆದಾಡುತ್ತಾ ಮಾತು ಮೌನವಾಗುತ್ತದೆ, ಮನಸ್ಸು ಹಾಗೇ ಇತಿಹಾಸಕ್ಕೆ ಜಾರುತ್ತದೆ...

ಕೊನೆಯ ದಿನ:
ವಿರೂಪಾಕ್ಷರವರು, ವೀರೇಶ್ ಮತ್ತು ತಿಮ್ಮಣ್ಣನವರ ಸಹಾಯದಿಂದ ಕಮಲಾ ಮಹಲ್ ನ ಎದುರಿಗಿರುವ ತೆನಾಲಿ ಮಂಟಪ ಏರುವ ಹಠ ತೊಟ್ಟು ಬೆಳಗ್ಗೆ ಹೊರಟೆವು. ನೋಡಲು ಸಣ್ಣದಾಗಿ ಕಂಡರೂ ಸಾಗುತ್ತಾ ಮುಗಿಯದ ಹಾದಿಯಾಯಿತು. ತೆನಾಲಿ ಮಂಟಪಕ್ಕೆ ಸಾಮಾನ್ಯವಾಗಿ ಯಾರೂ ಹೋಗುವುದಿಲ್ಲ. ಅಲ್ಲಿಗೆ ತಲುಪಲು ಸರಿಯದ ಹಾದಿಯೂ ಇಲ್ಲ. ಮದ್ಯೆ ದಾರಿ ತಪ್ಪಿ ಪಟ್ಟ ಪಾಡು ಹೇಳಲಾಗದು ಆದರೂ ಒಂದು ರೀತಿ ಚೆನ್ನಾಗಿತ್ತು. ದಾರಿಯಲ್ಲಿ ನಿರ್ಲಕ್ಷ್ಯಕ್ಕೆ ಒಳಗಾದ ಎಷ್ಟೊ ಶಿಲ್ಪಗಳು, ಮಂಟಪಗಳನ್ನು ಕಂಡೆವು ಮತ್ತು ಹಿಂದಿನ ಕಾಲದಲ್ಲಿ ಅಲ್ಲಿಗೆ ಹೋಗಲು ಮಾಡಿದ್ದ ದಾರಿ ಗುರುತುಗಳನ್ನು ಅಲ್ಲಲ್ಲಿ ಗಮನಿಸಿದೆವು.

ತೆನಾಲಿ ಮಂಟಪ ಬೆಟ್ಟದ ಹಾದಿ ಮತ್ತು ನಿರ್ಲಕ್ಷಿತ ಶಿಲ್ಪಗಳು

ತೆನಾಲಿ ಮಂಟಪ ಹತ್ತಿರವಾದಂತೆಲ್ಲಾ ಬೆಟ್ಟ ಕಡಿದಾಗುತ್ತಾ ಸಾಗಿತ್ತು. ಮುಂದೆ ರಸ್ತೆ ಮುಗಿದು ಗುಹೆಯಂತಾ ಸ್ಥಳ ತಲುಪಿದೆವು, ಬಂಡೆಗಳ ಸಂದುಗಳಿಂದ ತೂರಿ ಬಂಡೆಗಳ ತಬ್ಬಿ ಸಾಗುವಂತಾ ಸ್ಥಿತಿ ಬಂತು ಈ ಕ್ಷಣದಲ್ಲಿ ಜೀವ ಕೈಗೆ ಬಂದಂತಾಯಿತು. ಹೇಗೋ ಆಗೂ ಈಗೂ ಕಷ್ಟಪಟ್ಟು ಮೇಲೆ ಏರಿದ ನಂತರ ಎಲ್ಲ ಕಷ್ಟಗಳು, ಸುಸ್ತು ಮತ್ತು ನೋವುಗಲನ್ನು ಕ್ಷಣಾರ್ಧದಲ್ಲಿ ಮರೆತು ಹೋಗುವಂತಾ ಸೌಂದರ್ಯ ಕಂಡು ಬೆರಗಾಯಿತು, ಸಂತಸದಿಂದ ಮನಸ್ಸು ಹಾರತೊಡಗಿತು. ಅಂಥಾ ಬಿಸಿಲಿನಲ್ಲಿಯೂ ತಂಪಾದ ಗಾಳಿ ಹಾಯ್ ಎನ್ನಿಸುತಿತ್ತು.

ತೆನಾಲಿ ಮಂಟಪ ಬೆಟ್ಟ ಮತ್ತು ದುರ್ಗಮ ಹಾದಿ

ತೆನಾಲಿ ಮಂಟಪದ ಹಿನ್ನೆಲೆ ಕಥೆ ಸ್ವಾರಸ್ಯಕರವಾಗಿದೆ. ಕೃಷ್ಣದೇವರಾಯನು ಮಂಟಪ, ದೇವಾಲಯಗಳ ನಿರ್ಮಾಣ ಸ್ಪರ್ದೆಯನ್ನು ಏರ್ಪಡಿಸಿದ್ದನಂತೆ. ಆಗ ತೆನಾಲಿ ರಾಮನು ಈ ಗುಡ್ಡದ ಮೇಲೆ ಸಣ್ಣದೊಂದು ಮಂಟಪವನ್ನು ನಿರ್ಮಿಸಿದನಂತೆ. ಕೃಷ್ಣದೇವರಾಯನು ತೆನಾಲಿಯನ್ನು ಕೇಳಿದನಂತೆ "ಎಲ್ಲರೂ ಎಷ್ಟೊಂದು ದೊಡ್ಡದಾಗಿ ಮತ್ತು ಸುಂದರವಾಗಿ ನಿರ್ಮಿಸಿದ್ದಾರೆ, ನೀನು ಮಾತ್ರ ಆ ಗುಡ್ಡದಲ್ಲಿ ಸಣ್ಣ ಮಂಟಪವನ್ನು ಏಕೆ ಮಾಡಿದೆ" ಎಂದರಂತೆ. ತೆನಾಲಿಯು "ದೊರೆಗಳೆ, ಎಲ್ಲರೂ ಭವ್ಯವಾಗಿ ನಿರ್ಮಿಸಿರಬಹುದು ಆದರೆ, ನನ್ನ ಮಂಟಪದ ವಿಶೇಷತೆ ಎಂದರೆ ಅಲ್ಲಿ ನೀವು ನಿಂತು ನೋಡಿದರೆ ಪೂರ್ಣ ಹಂಪಿಯು ಕಾಣುತ್ತದೆ. ಎಲ್ಲರೂ ಭವ್ಯವಾಗಿ, ಸುಂದರವಾಗಿ ನಿರ್ಮಿಸಿರುವ ಮಂಟಪ ಮತ್ತು ದೇವಸ್ಥಾನ ಒಂದೇ ಸ್ಥಳದಿಂದ ನೀವು ವೀಕ್ಷಿಸಬಹುದು. ಅದೇ ನನ್ನ ಮಂಟಪದ ವಿಶೇಷತೆ" ಎಂದನಂತೆ. ಅರಸರಿಂದ ಪ್ರಶಂಸೆಯನ್ನೂ ಪಡೆದನಂತೆ. ಇದು ಸತ್ಯವೂ ಹೌದು, ಕಥೆಯ ಸತ್ಯಾಸತ್ಯಥೆ ತಿಳಿದಿಲ್ಲ ಆದರೆ ಇಲ್ಲಿ ನಿಂತರೆ ಪೂರ್ಣ ಹಂಪಿಯ ದರ್ಶನವಂತೂ ಪಡೆಯಬಹುದು. ಎತ್ತ ತಿರುಗಿದರೂ ರಾಶಿ ರಾಶಿ ಬಂಡೆಗಳ ಸಾಲು ಮದ್ಯೆ ಗುಡಿ, ಗೋಪುರ, ಮಂಟಪ ಮತ್ತು ದೇವಸ್ಥಾನಗಳ ಆಗರ.

ತೆನಾಲಿ ಮಂಟಪ ಬೆಟ್ಟದ ಹಾದಿ ಮತ್ತು ನಿರ್ಲಕ್ಷಿತ ಶಿಲ್ಪಗಳು

ಸಂಜೆಯ ವೇಳೆಗೆ ಸೂರ್ಯಾಸ್ತದ ಆನಂದ ಅನುಭವಿಸಿ ರೂಮಿನ ಕಡೆಗೆ ವಾಪಸ್ಸಾದೆವು. ಸ್ವಲ್ಪ ವಿಶ್ರಮಿಸಿ ನಮ್ಮ ಸಾಮಾನು ಸರಂಜಾಮುಗಳನ್ನು ಕಟ್ಟಿಕೊಂಡು ರಾತ್ರಿ ಬಸ್ಸು ಹತ್ತುವುದರೊಳಗೆ ಒಂದೆಡೆ ಮನಸ್ಸಿಗೆ ಖುಷಿ ಕೊಟ್ಟ ಛಾಯಾಚಿತ್ರಗಳು ಮತ್ತೊಂದೆಡೆ ನಾಲ್ಕು ದಿನಗಳಲ್ಲಿ ಬೆಳೆದ ಸ್ನೇಹಿತರ ಗುಂಪನ್ನು ಅಗಲುವ ಬೇಸರ.

ಪ್ರಸಿದ್ದ ಕಮಲಾ ಮಹಲ್

ಹಂಪಿಯ ಗತ ವೈಭವ ಸಾರುವ ಕೆಲವು ಸ್ಥಳಗಳು ಮತ್ತು ನಿರ್ಲಕ್ಷಿತ ಶಿಲ್ಪಗಳು, ಮಂಟಪಗಳು, ಚಿತ್ರಗಳು ಹಾಗೂ ಕುರುಹುಗಳು

ದರೋಜಿ ಮತ್ತು ಹಂಪಿಯಲ್ಲಿ ನಮಗೆ ಸಹಾಯ ಮಾಡಿದ ಸಹೃದಯಿ ಸ್ನೇಹಿತರ ಬಳಗ:

ತೆನಾಲಿ ಮಂಟಪದ ತುದಿಯಲ್ಲಿ ವೀರೇಶ್, ತಿಮ್ಮಯ್ಯ, ವಿರೂಪಾಕ್ಷರವರು ಮತ್ತು ನಾನು.

ವಿರೂಪಾಕ್ಷರವರು, ಲೋಕೇಶ್ ಮೊಸಳೆ ಮತ್ತು ವೀರೇಶ್.

ಸಾಹಸದಲ್ಲಿ ಲೋಕೇಶ್ ಮೊಸಳೆ

ತೆನಾಲಿ ಮಂಟಪ ಏರುವ ಹಾದಿಯಲ್ಲಿ ವೀರೇಶ್

ತಿಮ್ಮಯ್ಯ ಮತ್ತು ವೀರೇಶ್

ನಮ್ಮ ಪ್ರೀತಿಯ ಗೆಳೆಯರಾದ ವಿರೂಪಾಕ್ಷರವರು ಮತ್ತು ಪಂಪಾ ಸ್ವಾಮಿಯವರು

ದರೋಜಿ ಕರಡಿ ಧಾಮದಲ್ಲಿ ಹಗಲು ರಾತ್ರಿ ಎನ್ನದೆ, ಜೀವದ ಹಂಗು ತೊರೆದು ಕರ್ತವ್ಯ ನಿರ್ವಹಿಸುವ, ಕರಡಿಗಳೊಂದಿಗೆ ಅವಿನಾಭಾವ ಪ್ರೀತಿಯ ಸಂಭಂದ ಬೆಸೆದುಕೊಂಡು ಮಕ್ಕಳಂತೆ ಕಾಯುವ ಧಾಮದ ಕಾವಲುಗಾರ ಪುಟ್ಟಪ್ಪ ಕುಲಕರ್ಣಿ

ಈ ಪ್ರವಾಸದಲ್ಲಿ ಪ್ರತ್ಯಕ್ಷ ಹಾಗೂ ಪರೋಕ್ಷವಾಗಿ ಸಹಾಯ ಮಾಡಿದ ಎಲ್ಲಾ ಸ್ನೇಹಿತರಿಗೆ, ಪಂಪಾಸ್ವಾಮಿಯವರಿಗೆ, ವಿರೂಪಾಕ್ಷರವರು ಮತ್ತು ದರೋಜಿಯ ಕಾವಲುಗಾರರಾದ ಪುಟ್ಟಪ್ಪ ಕುಲಕರ್ಣಿ ರವರಿಗೆ ನನ್ನ ಕೃತಜ್ಞತೆಗಳು ಹಂಪಿಯ ಸುಂದರ ಚಿತ್ರಗಳನ್ನು ಸೆರೆಹಿಡಿಯಲು ಸಹಾಯ ಮಾಡಿದ ವಿರೂಪಾಕ್ಷರವರಿಗೆ ಧನ್ಯವಾದಗಳು. ತೆನಾಲಿ ಮಂಟಪ ಏರಲು ಸಹಾಯ ಮಾಡಿದ ವೀರೇಶ್ ಮತ್ತು ತಿಮ್ಮಯ್ಯರವರಿಗೆ ಧನ್ಯವಾದಗಳು.

- ಗೌರೀಶ್ ಕಪನಿ

ಮೈದನ ಹಳ್ಳಿಯಲ್ಲಿ ಕೃಷ್ಣಮೃಗಗಳು...

2008-02-15T23:32:00.000-08:00

ತುಮಕೂರು ಜಿಲ್ಲೆಯ ಮಧುಗಿರಿ ತಾಲ್ಲೂಕಿಗೆ ಸೇರಿದ ಮೈದನಹಳ್ಳಿಯಲ್ಲಿ ಕೃಷ್ಣಮೃಗಗಳನ್ನು ರಾಜ್ಯ ಸರ್ಕಾರದ ಅರಣ್ಯ ಇಲಾಖೆ ಸಂರಕ್ಷಿಸಿಕೊಂಡು ಬಂದಿದೆ. ಒಂದು ಅಂದಾಜಿನ ಪ್ರಕಾರ ಸುಮಾರು 1500 ರಿಂದ 2000 ದಷ್ಟು ಸಂಖ್ಯೆಯಲ್ಲಿ ಕೃಷ್ಣಮೃಗಗಳು ಇದ್ದು, ಸುಮಾರು 3 ಕಿ.ಮೀ ವ್ಯಾಪ್ತಿಯಲ್ಲಿ ಈ ರಕ್ಷಿತ ವನ ವಿಸ್ತಾರವಾದ ಹುಲ್ಲುಗಾವಲು ಪ್ರದೇಶದಲ್ಲಿದೆ. ಬೆಂಗಳೂರಿನಿಂದ ಸುಮಾರು 120 ಕಿ.ಮೀ ದೂರದಲ್ಲಿರುವ ಮೈದನಹಳ್ಳಿ ಹೆಚ್ಚಿನ ಸಂಖ್ಯೆಯ ಪ್ರವಾಸಿಗರಿಲ್ಲದೆ ತನ್ನ ಶಾಂತಿ ಮತ್ತು ಪ್ರಶಾಂತತೆಯನ್ನು ಉಳಿಸಿಕೊಂಡಿದೆ.

ತಲುಪುವುದು ಹೇಗೆ?

ಬೆಂಗಳೂರಿನಿಂದ ಹೊರಟು ತುಮಕೂರು ರಸ್ತೆಯ ಮೂಲಕ ನೆಲಮಂಗಲ ದಾಟಿ 70 ಕಿ.ಮೀ. ದೂರದ ತುಮಕೂರು ತಲುಪಬೇಕು. ಅಲ್ಲಿಂದ ಮಧುಗಿರಿ ರಸ್ತೆಯ ಮೂಲಕ ಮುಂದೆ ಸಾಗಿದರೆ 40 ಕಿ.ಮೀ. ಬಳಿಕ ಮಧುಗಿರಿ ತಲುಪುತ್ತೇವೆ. ಅಲ್ಲಿಂದ ಹಿಂದೂಪುರ ರಸ್ತೆಯಲ್ಲಿ ಸುಮಾರು 18 ಕಿ.ಮೀ. ಸಾಗಿದ ಬಳಿಕ ಪುರವರ ಎಂಬ ಊರಿನ ವೃತ್ತ ತಲುಪುತ್ತೇವೆ. ಅಲ್ಲಿಂದ ಎಡಕ್ಕೆ ತಿರುಗಿ ಸುಮಾರು 6 ಕಿ.ಮೀ. ಸಾಗಿದ ಬಳಿಕ ಬಲಕ್ಕೊಂದು ಸಣ್ಣ ಮಣ್ಣಿನ ರಸ್ತೆ ಸಿಗುತ್ತದೆ. ಅದೇ ರಸ್ತೆಯಲ್ಲಿ ಸುಮಾರು 2 ಕಿ.ಮೀ. ಸಾಗಿದರೆ ಮೈದನಹಳ್ಳಿಯ ಕೃಷ್ಣಮೃಗ ರಕ್ಷಿತ ವನ ಸಿಗುತ್ತದೆ...

ಕೃಷ್ಣಮೃಗ:

ಕೃಷ್ಣಮೃಗವು ಬಹಳ ಹೆದರಿಕೆಯ ಅಥವಾ ನಾಚಿಕೆಯ ಸ್ವಾಭಾವವನ್ನು ಹೊಂದಿದೆ. ಮನುಷ್ಯರ ಚಲನವಲನವನ್ನು ಬಹಳ ದೂರದಿಂದಲೇ ತುಂಬಾ ಸೂಕ್ಷ್ಮವಾಗಿ ಗಮನಿಸುತ್ತದೆ. ಕೃಷ್ಣಮೃಗಗಳ ಚಿತ್ರ ಕ್ಲಿಕ್ಕಿಸಲು ಬಹಳ ಹೆಣಗಾಡಬೇಕಾಯಿತು. ಅಲೆದು ಅಲೆದು ಸುಸ್ತಾಗಿದ್ದು ಬಿಟ್ಟರೆ ಒಳ್ಳೆಯ ಚಿತ್ರ ಮಾತ್ರ ಕ್ಲಿಕ್ಕಿಸಲಾಗಲಿಲ್ಲ, ಮುಂದೆ ಮತ್ತೊಮ್ಮೆ ಪ್ರಯತ್ನಿಸಬೇಕು.

ಕೃಷ್ಣಮೃಗಳು ಬಾಲ್ಯದಲ್ಲಿ ಚಿನ್ನದ ಬಣ್ಣದಲ್ಲಿದ್ದು, ಪ್ರೌಢಾವಸ್ಥೆಯಲ್ಲಿ ಕೃಷ್ಣ ವರ್ಣಕ್ಕೆ ತಿರುಗುತ್ತದೆ. ಹುಲ್ಲನ್ನು ತಿಂದು ಇವು ಬದುಕುತ್ತದೆ. ಇವುಗಳು ಸಾಮಾನ್ಯ ಗುಂಪುಗಳಲ್ಲಿ ತಿರುಗುತ್ತವೆ. ಪ್ರೌಢ ಹೆಣ್ಣು ಕೃಷ್ಣಮೃಗ ಗುಂಪಿನ ಸಾರಥ್ಯ ವಹಿಸುತ್ತದೆ. ಮನುಷ್ಯರ ರೀತಿಯಲ್ಲಿ ಸರ್ವ ಋತುವಿನಲ್ಲಿಯೂ ಸಂತಾನಾಭಿವೃದ್ದಿಯಲ್ಲಿ ತೊಡಗುತ್ತದೆ. ಆದರೂ ಏಪ್ರಿಲ್ ಮತ್ತು ಮೇ ತಿಂಗಳಲ್ಲಿ ಹೆಚ್ಚು ಸಂತಾನಾಭಿವೃದ್ದಿಯಲ್ಲಿ ತೊಡಗುತ್ತವೆ. ಕೃಷ್ಣಮೃಗಗಳು ಬೆಳಗ್ಗೆ ಆಹಾರ ಹುಡುಕಾಟದಲ್ಲಿ ತೊಡಗಿ ಮದ್ಯಾಹ್ನದಲ್ಲಿ ಮರದ ನೆರಳಿನಲ್ಲಿ ವಿಶ್ರಾಂತಿ ಪಡೆಯುತ್ತವೆ, ಮತ್ತೆ ಸಂಜೆ ಆಹಾರ ಸೇವನೆ ಪ್ರಾರಂಭ.

ಪಕ್ಷಿಲೋಕ ಮತ್ತು ಪರಿಸರ:

ತುಮಕೂರು ದಾಟಿ ಮಧುಗಿರಿಯ ಹಾದಿ ಹಿಡಿದ ಕೂಡಲೇ ನಮ್ಮ ಕಣ್ಣು ಮನಸ್ಸು ಸೆರೆ ಹಿಡಿಯುವುದು ಅಲ್ಲಿನ ಪರಿಸರ, ಬೆಟ್ಟ ಸಾಲು ಮತ್ತು ಪಕ್ಷಿಗಳು. ದಾರಿಯಲ್ಲಿ ಸಾಗುತ್ತಾ ಎಡಬಲದಲ್ಲಿ ಅತಿ ಸುಂದರವಾದ ಬೆಟ್ಟಸಾಲುಗಳು ಮತ್ತು ಅಲ್ಲಿನ ಕಲ್ಲು ಬಂಡೆಗಳು, ಯಾರೋ ಅದ್ಬುತವಾಗಿ ವಿನ್ಯಾಸಮಾಡಿ ತುಂಬಾ ಅಚ್ಚುಕಟ್ಟಾಗಿ ಜೋಡಿಸಿದಂತೆ ಕಾಣುವ ಬಂಡೆಗಳೇ ಸುಂದರ. ದಾರಿಯಲ್ಲಿ ನಮಗೆ ತುಂಬಾ ಕೆರೆಗಳು ನೋಡಸಿಗುತ್ತವೆ. ಹಾಗೇ ನಾವು ಅಕಸ್ಮಾತ್ ಬೇಟಿ ನೀಡಿದ ಕೆರೆ "ಥರಟಿ" ಹಳ್ಳಿಯ ಸಮೀಪದ "ಅಗ್ರಹಾರ ಕೆರೆ" ಅದು ತನ್ನ ಒಡಲಲ್ಲಿ ಒಂದು ಸಣ್ಣ ಪಕ್ಷಿಲೋಕವನ್ನೇ ಇಟ್ಟುಕೊಂಡಿದೆ. ಕೆರೆಯ ಅಕ್ಕಪಕ್ಕ ತುಂಬಾ ಪಕ್ಷಿಗಳು ಜೀವಿಸುತ್ತಿದ್ದು ಅಲ್ಲಿನ ಕಲರವ ಕೇಳಿ ಆನಂದಿಸುವುದೇ ಅದ್ಬುತ ಸಂಗತಿ. ಬೆಂಗಳೂರಿನ ಧೂಳು, ಹೊಗೆ, ಗಲಾಟೆ ಮತ್ತು ಒತ್ತಡದಿಂದ ಬೇಸತ್ತಾಗ ಹಾಗೇ ಸುಮ್ಮನೆ ಒಂದು ದಿನ ಈ ಪ್ರದೇಶದಲ್ಲಿ ಕಳೆದು ಬನ್ನಿ. ವ್ಯತ್ಯಾಸ ನಿಮಗೆ ತಿಳಿಯುತ್ತದೆ.

ನೆನಪಿರಲಿ, ನಿಮ್ಮ ಭೇಟಿ ಅಲ್ಲಿನ ಪರಿಸರಕ್ಕೆ ಹಾನಿತರದಿರಲಿ...

- ಸಾಮಾನ್ಯ

ಹೀಗೊಂದು ರಾಜ್ಯೋತ್ಸವ ಆಚರಣೆ

2007-11-12T06:17:00.000-08:00

ಅಂದು ಬೆಳಗ್ಗೆ ಎಂದಿನಂತೆ ಕಛೇರಿಗೆ ಬಂದು ಕೆಲಸ ಪ್ರಾರಂಭಿಸುವ ಮುನ್ನ ನನ್ನ e-ಮಿಂಚೆ ತೆರೆದೆ. ಗೆಳೆಯ ಬಸವರಾಜುವಿನ "ಒಂದು ಸಣ್ಣ ವಿನಂತಿ" ಎಂಬ ಶೀರ್ಷಿಕೆಯ ಮಿಂಚೆ ಬಂದು ನನ್ನ inbox ನಲ್ಲಿ ಕುಳಿತಿತ್ತು. ಯಾವಾಗಲು ವಿಶಿಷ್ಟ ಮಿಂಚೆಗಳು ಮತ್ತು ಚರ್ಚೆಗಳನ್ನು ಕುಳುಹಿಸುವ ಗೆಳೆಯನ ಪತ್ರದಲ್ಲಿ ಏನಾದರು ಹೊಸತನ್ನು ನಿರೀಕ್ಷಿಸುತ್ತಾ ಪತ್ರ ತೆರೆಯಲು ಕ್ಲಿಕ್ ಮಾಡಿದೆ.

ಈ ಬಾರಿ ಗೆಳೆಯರಾದ ಬಸವರಾಜು ಮತ್ತು ಭರತ್ ಒಂದು ಗಂಭೀರ ವಿಷಯದ ಬಗ್ಗೆ ಚರ್ಚೆ ಪ್ರಾರಂಬಿಸಿದ್ದರು. ಈ ಸಲ ರಾಜ್ಯೋತ್ಸವಕ್ಕೆ ನಮ್ಮ ಕಲಾವಿದ ಸ್ನೇಹಿತ ಬಳಗದಿಂದ ಏನಾದರೂ ವಿಶೇಷ ಚಟುವಟಿಕೆ ನೆಡೆಸಲು ಯೋಚಿಸಿ ಪ್ರಸಕ್ತ ಕರ್ನಾಟಕ, ಕನ್ನಡಕ್ಕೆ ಸಂಭಂದಿಸಿದ ಬಗ್ಗೆ ಬಳಗದ ಸ್ನೇಹಿತರೆಲ್ಲರೂ ವಿನ್ಯಾಸಮಾಡಿ ಅದರಲ್ಲಿ ಒಂದು ವಿನ್ಯಾಸವನ್ನು ಆಯ್ಕೆಮಾಡಿ ಅದನ್ನು T-Shirt ಮೇಲೆ ಮುದ್ರಿಸಿ ರಾಜ್ಯೋತ್ಸವಕ್ಕೆ ಬಳಗದ ಸ್ನೇಹಿತರು ಧರಿಸಬೇಕೆಂದು ಇತ್ತು. ಈ ಕಾರ್ಯಕ್ರಮಕ್ಕೆ ಬಳಗದ ಎಲ್ಲರಿಂದ ಉತ್ತಮ ಪ್ರತಿಕ್ರಿಯೆ ಬಂತು. ಕೊನೆಯದಾಗಿ 20 ವಿನ್ಯಾಸಗಳು ಸಿದ್ದಗೊಂಡು ನಂತರ ಗೆಳೆಯ ರಾಜೇಶ್ ಆಚಾರ್ಯರವರ ವಿನ್ಯಾಸ ಮೆಚ್ಚುಗೆ ಪಡೆದು ಎಲ್ಲರ ಆಯ್ಕೆಗೆ ಪಾತ್ರವಾಯಿತು.

ಈ ನಮ್ಮ ಚಟುವಟಿಕೆಯಿಂದ ಸ್ಪೂರ್ತಿಗೊಂಡ ನಾನು ಕಛೇರಿಯಲ್ಲಿ ಸಹೋದ್ಯೋಗಿಗಳಿಗೆ ತಿಳಿಸಿದೆ. ಅವರು ಆಸಕ್ತಿ ತೋರಿಸಿದ್ದು ನನ್ನ ಉತ್ಸಾಹಕ್ಕೆ ಗರಿ ಮೂಡಿತು. ಯಾರಿಗೂ ಬಲವಂತ ಮಾಡದೆ, ಆಸಕ್ತಿ ಇರುವವರು ಸ್ವಯಂ ಪಾಲ್ಗೊಳ್ಳುವಂತೆ ಆಹ್ವಾನವಿತ್ತೆವು. ನಿರೀಕ್ಷೆಗೂ ಮೀರಿ ಪ್ರತಿಕ್ರಿಯಿಸಿದ ಗೆಳೆಯರು ನನ್ನಲ್ಲಿ ಅಚ್ಚರಿ ಮೂಡಿಸಿತು. ಕನ್ನಡ ಬಾರದ ಹೊರರಾಜ್ಯದ ಸಹೋದ್ಯೋಗಿಗಳೂ ಕೂಡ ಖುಷಿಯಿಂದ ಪಾಲ್ಗೊಂಡರು, ಸಂಭ್ರಮಿಸಿದರು. IT ಯಲ್ಲಿ ಕನ್ನಡದ ಶುಭ್ರ ಮಲ್ಲಿಗೆಯ ಕಂಪು ಬೀರುತ್ತಿತ್ತು. ನವೆಂಬರ್ 2 ರಂದು ಎಲ್ಲರೂ T-Shirt ಧರಿಸಿ ಸಂಭ್ರಮಿಸಿ, ಒಗ್ಗಟ್ಟು ಸಾರಿದೆವು. ಕನ್ನಡ ಬಾರದ ಸ್ನೇಹಿತರಿಗೆ ಕನ್ನಡ ಕಲಿಸುವ ಪಣತೊಟ್ಟೆವು.

ನಮ್ಮ ಈ ಚಟುವಟಿಕೆ ಸಣ್ಣದಾಗಿ ಕಂಡರೂ ಪ್ರಸಕ್ತ ಮಾಹಿತಿ ತಂತ್ರಜ್ನಾನ ಕ್ಷೇತ್ರದಲ್ಲಿ ಇಂಥ ಸಣ್ಣ ಸಣ್ಣ ಚಟುವಟಿಕೆಗಳು ನಮ್ಮ ಇರುವಿಕೆಯನ್ನು ಪ್ರತಿಪಾದಿಸುತ್ತವೆ ಮತ್ತು ಕನ್ನಡೇತರರಲ್ಲಿ ಕನ್ನಡದ ಬಗ್ಗೆ ಒಂದು ಸಣ್ಣ ಆಸಕ್ತಿ, ಒಲವು ಮತ್ತು ಗೌರವಕ್ಕೆ ಖಂಡಿತಾ ಪ್ರೇರಣೆಯಾಗುತ್ತದೆ ಎಂದು ನಂಬಿದ್ದೇನೆ.

ಗೆಳಯ ಭರತ್ ರವರಿಗೆ ಸುಮಾರು 100ಕ್ಕೂ ಹೆಚ್ಚು ಕರೆಗಳು ಹಾಗೂ 50ಕ್ಕೂ ಹೆಚ್ಚು ಮಿಂಚೆಗಳು ಪ್ರಶಂಸೆಯ ಮಾತುಗಳು ಹಾಗೂ ವಿನ್ಯಾಸಗಳಿಗಾಗಿ, T-shirt ಗಳಿಗಾಗಿ ವಿಚಾರಣೆಗಳು ಬಂದಿವೆಯಂತೆ!! ITಯಲ್ಲಿ ಕನ್ನಡಕ್ಕೆ ಗೌರವವಿಲ್ಲ, ಸ್ಥಾನವಿಲ್ಲ ಎಂದು ಮೈಕುಗಳ ಮುಂದೆ ಬಡಾಯಿಬಿಡುವ ಭಾಷಣ ಪ್ರಿಯರಿಗೆ ಮುಂದೆ ಮಾತನಾಡಲು ಮೈಕು ಸಿಗುವುದಿಲ್ಲ. ITಯಲ್ಲೂ ಕನ್ನಡ ದೀಪ ಬೆಳಗುತ್ತಿದೆ... ಬೆಳಗುತ್ತಿರುತ್ತದೆ...

ಈ ಚಟುವಟಿಕೆಗೆ ಪ್ರೇರಣೆಯಾದ ಹಾಗೂ ಪಾಲ್ಗೊಂಡ ಎಲ್ಲಾ ಬಳಗದ ಸ್ನೇಹಿತರಿಗೆ ಧನ್ಯವಾದಗಳು.

ನಮ್ಮ ಕಲಾವಿದ ಬಳಗದಿಂದ ರಚಿಸಿದ ವಿನ್ಯಾಸಗಳು ಈ ಲಿಂಕ್ ನಲ್ಲಿ ವೀಕ್ಷಿಸಲು ಲಭ್ಯ. http://picasaweb.google.com/rajuyelbee/Naadu_nudi/

- ಸಾಮಾನ್ಯ